აზერბაიჯანი მიიჩნევს, რომ აშშ, საფრანგეთი და გერმანია ქვეყნის შიდა საქმეებში ერევიან, როდესაც დამოუკიდებელი მედია გამოცემას, AbzasMedia-ს აფინასნებენ. გამოცემის ოფისში პოლიციამ, გასულ კვირას, რეიდი მოაწყო.

სამშაბათს, აზერბაიჯანის საგარეო საქმეთა სამინისტრომ, დაფინანსების საკითხის განსახილველად, საფრანგეთის, გერმანიის და აშშ-ის ელჩები დაიბარა.

მათი განცხადების მიხედვით, შეხვედრის დროს სამინისტრომ აშშ-ის საერთაშორისო განვითარების სააგენტო (USAID), ამერიკული არაკომერციული ორგანიზაცია FreedomNow და დანიის New Democracy Fund აზერბაიჯანის ტერიტორიაზე არალეგალური ფინანსური რესურსების გადარიცხვაში დაადანაშაულა, რაც "არღვევს გრანტის მიღების წესს და "აბზასმედიას" საქმიანობაში უკანონო წვლილის შეტანაა".

სამინისტრომ აღნიშნა, რომ საელჩოების "უკანონო ქმედებები არის დიპლომატიური ურთიერთობების შესახებ ვენის კონვენციის დარღვევა".

გასულ კვირას, აზერბაიჯანმა "აბზასმედიას" ოფისებში რეიდი ჩაატარა და დააკავა კომპანიის დირექტორი ულვი ჰასალი, მთავარი რედაქტორი სევინჯ ვაგიფგიზი და დირექტორის მოადგილე მაჰამად კეკალოვი.

ისინი კონტრაბანდაში დაადანაშაულეს.

ელჩის გამოძახების საპასუხოდ, აშშ-ის საელჩომ აზერბაიჯანში, ოთხშაბათს, "ამერიკის ხმას“ განუცხადა, რომ USAID-ის მიმართ ბრალდებები "მცდარია და ფუნდამენტურად არასწორად ახასიათებს დახმარების მიზანს".

"როგორც ყოველთვის, ჩვენი დახმარება გამჭვირვალეა. USAID-ის ყველა პროგრამა ხელს უწყობს დემოკრატიულ ღირებულებებს, რომლებიც მიზნად ისახავს თავისუფალ და მშვიდობიან საზოგადოებებს”, — განაცხადეს მათ.

გერმანიის საელჩომ დაუყონებლივ უარყო მის მიმართ წაყენებული ბრალდებები და გამოთქვა შეშფოთება კეკალოვის დაკავების გამო, რომელიც, ასევე, არის შეზღუდული შესაძლებლობის მქონე პირთა უფლებების აქტივისტი და ხელმისაწვდომი მოდის ბრენდის დამფუძნებელი, მის მიერ შექმნილი ტანსაცმლის ხაზები ითვალისწინებს შეზღუდული შესაძლებლობის მქონე პირთა საჭიროებებს.

"გერმანიის საელჩო მხარს მუდმივად უჭერდა მაჰამედ კეკალოვს და მის სოციალურ ვალდებულებას შეზღუდული შესაძლებლობის მქონე პირთა მიმართ, მათ შორის, 1500 ევროს ფინანსური კონტრიბუციით, Kekalove Adaptive-ის მიერ შშმ პირთა საერთაშორისო დღესთან დაკავშირებით ორგანიზებული მოდის ჩვენებასთან დაკავშირებით 2021 წლის 3 დეკემბერს.

შეშფოთებულები ვართ კეკალოვისთვის წაყენებული ბრალდებით და ველოდებით, რომ მისი სასამართლო პროცესი იქნება სამართლიანი", — ნათქვამია გერმანიის საელჩოს განცხადებაში.

აზერბაიჯანელი გამომძიებელი ჟურნალისტი, ხადიჯა ისმაილი ამბობს, რომ აზერბაიჯანის მთავრობის კრიტიკა დასავლეთის საელჩოების მიმართ აჩვენებს, თუ ვის მიმართ არის ლოიალური ამჟამად.

"ქვეყნები, რომლებიც დასავლეთს მტრად აცხადებენ, ჩვეულებრივ, რუსეთის მკლავებში არიან. აქამდე დაბალანსებულ საგარეო პოლიტიკაზე მაინც საუბრობდნენ; ახლა აზერბაიჯანის ხელმძღვანელობის რიტორიკა არაფრით განსხვავდება ლუკაშენკოს რიტორიკისაგან“, — თქვა ისმაილმა.

სამშაბათს, AbzasMedia-ს რეიდიდან ერთი კვირის შემდეგ, აზერბაიჯანის ხელისუფლებამ, ასევე, ბრალი წაუყენა დამოუკიდებელი ონლაინ ტელევიზიის Kanal 13-ის დამფუძნებელს აზიზ ორუჯოვს, ნებართვის გარეშე სახლის აშენების გამო.

ჟურნალისტები და უფლებადამცველები აცხადებენ, რომ ორუჯოვის დაკავება და AbzasMedia-ზე რეიდი, პოლიტიკურად მოტივირებული იყო.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.