აშშ-ის საგადასახადო დეპარტამენტის ცნობით, რეკრეაციული მარიხუანის ლეგალიზაციის შემდეგ, შეძენის მსურველთა რაოდენობა დღიდან-დღემდე იზრდება.

ასეთი დიდი მოთხოვნის გამო, გუბერნატორმა ბრაიან სანდოვალმა დააკმაყოფილა საგადასახადო დეპარტამენტის რეკომენდაცია საგანგებო მდგომარეობის შესახებ, რომელიც გამოსავალს უფრო მეტი ლიცენზიის გაცემაში ხედავს.

ნევადას შტატში დაახლოებით ორმოცდაათმა აფთიაქმა მიიღო რეკრეაციული მარიხუანის გაყიდვის ლიცენზია. გაყიდვები პირველი ივლისიდან დაიწყო.

აღსანიშნავია, რომ ამ აფთიაქებს მარაგის ამოწურვის შემდეგ, დანაკლისის შევსების პირდაპირი უფლება არ გააჩნიათ. საქმე ისაა, რომ მწარმოებლისგან გამყიდველებისთვის მიწოდების ექსკლუზიურ უფლებას ალკოჰოლის ბითუმად მოვაჭრეებს აქვთ. ამგვარი კანონი Carson City-ის ადგილობრივმა სასამართლომ მიიღო, რათა მარიხუანაზე გაზრდილი მოთხოვნის გამო, ალკოჰოლის ბიზნესი გაკოტრებისგან დაეცვა. ნევადა არის ერთადერთი შტატი, სადაც მარიხუანა ლეგალიზებულია და ამგვარი კანონი მოქმედებს.

საგადასახადო დეპარტამენტის ინიციატივა ამ პრობლემის დაძლევას ემსახურება. რეზოლუცია, რომელიც ჯერ კიდევ არ არის მიღებული, დეპარტამენტს უფლებას მისცემს, რომ მწარმოებლისგან შესყიდვის და შემდგომ გაყიდვის ლიცენზია უფრო მეტ მსურველს მისცეს, მათ შორის მათაც, ვინც ალკოჰოლის ბიზნესში არ არის ჩართული.

საგადასახადო დეპარტამენტის პრეს-სპიკერი ჟურნალ Renault-თან საუბარში აცხადებს, რომ მარიხუანის ბაზრის განვითარება უმნიშვნელოვანესია. მისი თქმით, რეკრეაციული მარიხუანის ბიზნესის ჩავარდნას ხანგრძლივი და უარყოფითი შედეგები ექნება, რადგან მარიხუანის კულტივაციისთვის დაწესებული 15%-იანი გადასახადი უტოლდება იმ თანხას, რომელსაც შტატი საჯარო სკოლების დაფინანსებაზე ხარჯავს.