მოკლედ: პარტია ქართული ოცნების თავმჯდომარემ, ირაკლი კობახიძემ კონფერენციაზე, სახელწოდებით "საქართველოს გზა ევროკავშირისკენ" თქვა, რომ ევროკომისიამ უკვე მიიღო დადებითი რეკომენდაცია და "შესაბამისად, ახლა წარსულის დავიწყების და წინ გახედვის დროა."

რას აპირებენ: კობახიძის თქმით, უკვე შედგა კომუნიკაცია მთავრობისა და ევროკომისიის წარმომადგენლებს შორის. სამოქმედო გეგმა ევროკომისიას მომავალი კვირის დასაწყისში გადაეგზავნება.

  • ისაუბრა ანტიევროპულ დეზინფორმაციაზე, როგორც ერთ-ერთ საკითხზე ევროკომისიის რეკომენდაციებიდან. "კანონმდებლობის ფარგლებში ყველაფერი გაკეთდება იმისათვის, რომ ვებრძოლოთ კონკრეტულად იმ დეზინფორმაციას, რომელიც ევროკავშირის და მისი ღირებულებების წინააღმდეგ არის მიმართული", — თქვა მან.
  • განაცხადა, რომ მოამზადებენ საკანონმდებლო ინიციატივებს საარჩევნო სისტემისთვის: "რეკომენდაციაში საარჩევნო რეფორმების დასრულებაზეც არის საუბარი და ჩვენ კონკრეტული საკანონმდებლო ინიციატივებს მოვამზადებთ და სამოქმედო გეგმაშიც ავსახავთ."

  • სასამართლო რეფორმის დასრულების მიზნით გაცემულ რეკომენდაციაზე საუბრისას კი აღნიშნა, რომ სამუშაო პროცესი გაგრძელდება, "თუმცა აუცილებელია დაზუსტდეს თუ რა იგულისხმება იუსტიციის საბჭოს ფუნდამენტურ რეფორმაში."

ბოლო ხაზი: 2023 წლის 8 ნოემბერს ევროკომისიის მოხსენება გამოქვეყნდა და მათ გასცეს რეკომენდაცია ევროსაბჭოსთვის, მიენიჭოს საქართველოს ევროკავშირის კანდიდატი ქვეყნის სტატუსი, თუმცა, გარკვეული პირობებით.