ის ამბავი გახსოვთ, ახალ ზელანდიაში სელაპი რომ ბინაში შეიჭრა, კატა სახლიდან გააგდო და დივანზე მოკალათდა? მსგავსი ისტორია განვითარდა ცოტა ხნის წინ ახალი ზელანდიის მეზობელ კუნძულ ტასმანიაზე.

გამთენიისას, 7-ის წუთებზე, ავსტრალიელი ემბერ ჰარისი უცნაურმა ხმაურმა გააღვიძა. სანაპიროს მახლობლად მცხოვრებმა ქალმა თავიდან იფიქრა, ვიღაც ჩემი მანქანის მოპარვას ცდილობსო. თუმცა, საძინებლის ფანჯრიდან გახედვისას ეზოში ქურდის ნაცვლად თავისი ნაცნობი, სახელად ნილი დახვდა, რომელიც პირდაპირ მას მისჩერებოდა.

ნილი — სწორედ ასე შეარქვეს ადგილობრივებმა 600-კილოგრამიან სელაპს, რომელიც სანაპიროებზე და ქუჩებში ხეტიალშია შემჩნეული. მეტიც, ცხოველს ინსტაგრამზე საკუთარი გვერდი აქვს.

იმ დღეს კი ნილმა ემბერის ეზო საფუძვლიანად დაათვალიერა და ბინაში შეღწევაც მოიწადინა. მაგრამ, წარუმატებელი მცდელობის შემდეგ, ავტოფარეხს მიაშურა და პირდაპირ ქალის მანქანის წინ მოიკალათა.

რა გაეწყობოდა, ემბერმა თავის უფროსს დაურეკა და ამცნო, სამსახურში მოსვლას ვერ ვახერხებო.

"ეს ამბავი ისტორიის წიგნებში შევა, როგორც სამსახურის გაცდენის საუკეთესო მიზეზი", — ამბობს ჰარისი, — "მაგრამ, რა თქმა უნდა, უფროსს ფოტოები გავუგზავნე იმაში დასარწმუნებლად, რომ არაფერს არ ვიგონებდი".

ნილს მშვიდად სძინავს, სანამ ემბერი ჟურნალისტს ინტერვიუს აძლევს.

ფოტო: Australian Broadcasting Corporation

უფროსი, როგორც ჩანს, ამ საპატიო მიზეზს გაგებით მოეკიდა. თუმცა, ჰარისს სხვა საფიქრალი გაუჩნდა.

"ახლა მშვიდად თვლემს", — უთხრა ქალმა ადგილობრივი რადიოს დილის გადაცემას, — "მაგრამ წარმოდგენა არ მაქვს, რა უნდა ვქნა, როცა ეზოში სელაპი მყავს".

ექსპერტმა ემბერს განუცხადა, რომ ნილი მის ეზოში სამიდან ოთხ კვირამდე შეიძლება დარჩენილიყო, მერე კი ადგილს თავისით დატოვებდა.

"ვერ ვხვდები, ჩემი ეზო რატომ არჩია, მაგრამ შეუძლია იმდენ ხანს დარჩეს, რამდენსაც მოისურვებს", — აღნიშნა ჰარისმა.

თუმცა, მასპინძლის სტუმართმოყვარეობის მიუხედავად, სელაპმა ემბერის კარ-მიდამო რამდენიმე საათში დატოვა.