დეტალები: სოციალური სამართლიანობის ცენტრი მოუწოდებს შინაგან საქმეთა სამინისტროს, გაათავისუფლოს რაჭის ტყეების დასაცავად გამართულ აქციაზე დაკავებულები.

  • მათი თქმით, შეკრების ლიდერების დაკავების მიზანი პროტესტის დასუსტება იყო.
  • "მიგვაჩნია, რომ სამართალდამცავების მხრიდან სამინისტროს ტერიტორიაზე შეშვებაზე უარი წარმოადგენს საქართველოს კონსტიტუციითა და ადამიანის უფლებათა საერთაშორისო სამართლით განმტკიცებულ შეკრების თავისუფლებაში უხეშ ჩარევას", — აღნიშნულია SJC-ის განცხადებაში.

რა ხდება: გუშინ, 18 ნოემბერს, გარემოსა და სოფლის მეურნეობის სამინისტროსთან, შსს-მ დააკავა რაჭის ტყეების პროტესტის 11 მონაწილე.

  • ისინი რაჭის ტყის ლიცენზიის გაუქმების მოთხოვნით აქციას მართავდნენ.
  • პროტესტის მონაწილეებმა სამინისტროს წინ გაშალეს პატარა კარავიც.
  • შსს ამტკიცებს, რომ აქციის მონაწილეებმა დაარღვიეს საზოგადოებრივი წესრიგი.

არქივიდან: გასულ წელს, გამოცემა მთის ამბებმა გაარკვია, რომ სახელმწიფომ რაჭაში 104,712 ჰექტარ ტყეზე (რაჭის ტერიტორიის მესამედი და ქვეყნის ტერიტორიის 1.4%) სამონადირეო მეურნეობის მოწყობის 49 წლიანი ლიცენზია გასცა კომპანიაზე, რომლის საბოლოო ბენეფიციარი მესაკუთრეც რუსული კავშირების მქონე ბიზნესმენი დავით ხიდაშელია.

  • ორგანიზაცია "საერთაშორისო გამჭვირვალობა — საქართველოს" მიხედვით, დავით ხიდაშელთან დადებული გარიგების შედეგად საქართველომ 2 მილიონი ლარის შემოსავალი დაკარგა.