რა ხდება: პრემიერ-მინისტრმა, ირაკლი ღარიბაშვილმა დღეს, ჩინეთის ელჩთან შეხვედრის დროს, სინანული გამოხატა სალომე ზურაბიშვილის განცხადების გამო.

სტრიქონებს შორის: მთავრობის პრესსამსახურის ინფორმაციით, 11 ნოემბერს, სალომე ზურაბიშვილს LCI-ს ჟურნალისტმა ჰკითხა, იმედოვნებს თუ არა, რომ ოდესმე, ვლადიმერ პუტინი და ჩინეთის პრეზიდენტი, სი ძინ პინი გასამართლდებიან.

  • პრეზიდენტმა უპასუხა, რომ ეს ისტორიული შედეგი იქნებოდა, თუმცა, აღნიშნა, რომ ეს არარეალისტურად მიაჩნია.

დეტალები: მთავრობის პრესსამსახურის ინფორმაციით, დღეს, ჩინეთის ელჩთან შეხვედრისას ღარიბაშვილმა თქვა, რომ მსგავსი განცხადება "კატეგორიულად მიუღებელია და შემაშფოთებელია".

  • მისივე თქმით, ეს რიტორიკა ეწინააღმდეგება საქართველოს ხელისუფლების, ქართველი ხალხის დამოკიდებულებას ჩინეთთან და არ შეესაბამება ორი ქვეყნის მეგობრული, სტრატეგიული პარტნიორობის სულისკვეთებას, ასევე, ზიანს აყენებს ორ ქვეყანას შორის არსებულ მეგობრულ და პარტნიორულ ურთიერთობას.
  • პრემიერმა, ასევე, აღნიშნა, რომ ეს არ არის პირველი შემთხვევა, როდესაც სალომე ზურაბიშვილის შეფასებები არ ემთხვევა მთავრობის პოზიციას, რის გამოც, ღარიბაშვილის შეფასებით, "უხერხულ მდგომარეობაში აყენებს საქართველოს საერთაშორისო იმიჯს".
  • ირაკლი ღარიბაშვილმა ელჩთან განმარტა, რომ საპარლამენტო რესპუბლიკაში პრეზიდენტი არ ახორციელებს ქვეყნის საგარეო პოლიციკას და შესაბამისად, სალომე ზურაბიშვილის განცხადება ფორმალურადაც არ გამოხატავს საქართველოს ხელისუფლების დამოკიდებულებას ჩინეთისა და მისი ლიდერის მიმართ.
  • ღარიბაშვილმა იმედი გამოთქვა, რომ პრეზიდენტის განცხადება გავლენას არ მოახდენს, არ დააზიანებს საქართველოსა და ჩინეთის ურთიერთობის "უაღრესად პოზიტიურ, ისტორიულ დინამიკას".