დემირელის სახელობის სკოლა-ლიცეუმის მენეჯერის, მუსტაფა ემრე ჩაბუქის ადვოკატი, სოსო ბარათაშვილი არ იზიარებს საქართველოს ლტოლვითა და განსახლების სამინისტროს გადაწყვეტილებას მისი დაცვის ქვეშ მყოფისთვის ლტოლვილის სტატუსის არ მინიჭების შესახებ. ამის შესახებ ბარათაშვილმა დღეს, 10 ივლისს გამართულ პრესკონფერენციაზე განაცხადა და არგუმენტი თქვა.

საქართველოს ლტოლვილთა და განსახლების სამინისტროში აღნიშნავენ, რომ თურქეთის ციხეებში შეინიშნება ადამიანის უფლებათა მდგომარეობის გაუმჯობესება და დასძენენ, რომ თურქეთის ციხეში გადაყვანის შემთხვევაში, ჩაბუქს წამება და არაადამიანური მოპყრობა არ ემუქრება. ჩაბუქის ადვოკატის თქმით, "ამნესტი ინტერნეიშენელი" თავის დასკვნაში მიუთითებს, რომ თურქეთის ციხეებში არსებული დარღვევები კიდევ გრძელდება. ადვოკატის განმარტებით, ეს დასკვნა, თავის მხრივ, ეყრდნობა გაეროს სპეციალური წარმომდგენლის მოხსენებას. ბარათაშვილის მიაჩნია, რომ სწორედ ამიტომ ლტოლვილთა სამინისტრო ეწინააღმდეგება "ამნესტი ინტერნეიშენელისა" და გაეროს დასკვნებს.

"საქართველოს ხელისუფლებამ უნდა გააკეთოს არჩევანი, შეინარჩუნოს ღირსება, თუ ურჩევნია იყოს ღირსება აყრილი. როგორც ჩანს, ჩვენი სახელმწიფო არ არის იმ მასშტაბით გაძლიერებული რომ სათანადო, დასაბუთებული პასუხი გასცეს ამგვარ უკანონო ქმედებას. ამიტომაა საჭირო სხვა საერთაშორისო ორგანიზაციების დახმარება, წინააღმდეგ შემთხვევაში კატასტროფულ მდგომარეობაში აღმოვჩნდებით", - აღნიშნა ბარათაშვილმა.

მუსტაფა ემრე ჩაბუქი თურქეთის მხარის მოთხოვნით საქართველოში 24 მაისს დააკავეს. მას თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. ხელისუფლებას ჩაბუქის გათავისუფლებისკენ და თურქეთისთვის არგადაცემისკენ მოუწოდა რვა არასამთავრობო ორგანიზაციამ.