ამერიკული The Voice, რომლის მონაწილეც ქართველი მომღერალი ნინი ბრეგვაძეა, კვლავ გრძელდება. ამჯერად მაყურებელმა Knockout-ის რაუნდი იხილა, რომელშიც ნინი ბრეგვაძემ კონკურენტი ისევ დაამარცხა. ნინიმ Radiohead-ის ცნობილი ჰიტი Karma Police შეასრულა და ჟიურის მოწონებაც დაიმსახურა.

ნინი ბრეგვაძემ, რომელიც კონკურსში სასცენო სახელით Nini Iris მონაწილეობს, Knockout-ის რაუნდში ოლივია მინოგი დაამარცხა. "Knockout-ის გამარჯვებულად ნინის ვირჩევ, რადგან ის ზებუნებრივია. რაც ნინის თავისი ხმით შეუძლია, ამ კონკურსში ვერავინ გააკეთებს. მართლა ვფიქრობ, რომ ნინის კონკურსის მოგება შეუძლია", — განაცხადა ნინის მწვრთნელმა, ნაილ ჰორანმა.

შეგახსენებთ, რომ ბრმა კასტინგზე ნინიმ სიმღერის დაწყებიდან სულ რამდენიმე წამში ოთხივე მწვრთნელი შემოატრიალა, საბოლოოდ კი, ქართველმა მომღერალმა ნაილ ჰორანი აირჩია და სწორედ მის გუნდში გააგრძელა ბრძოლა. ცოტა ხნის წინ რინგის რაუნდში ნინიმ კონკურსანტ სოფია ჰოფმანს გაუწია კონკურენცია. კონკურსის მონაწილეებმა ცნობილი როკ ჯგუფის, Blondie-ის, სიმღერა Heart of Glass შეასრულეს, ჟიურიმ კი გამარჯვებულად ნინი დაასახელა.

ნინი ბრეგვაძე საქართველოდან ნიუ-იორკში საცხოვრებლად და მუსიკალური კარიერის გასაგრძელებლად 2016 წელს გადავიდა. ნინიმ ქართველ მაყურებელს თავი X ფაქტორიდან დაამახსოვრა, როცა მომღერალი 2015 წელს X ფაქტორის მე-2 სეზონის ფინალისტი გახდა.

ნინის ამერიკული The Voice-ის შემდეგ რაუნდებში მაყურებელი მალე იხილავს. რაც შეეხება ბრმა კასტინგს, ნინიმ ჯგუფ Everybody Loves an Outlaw-ის ცნობილი სიმღერა I See Red შეასრულა, ჟიურიმ კი მას "პოტენციური გამარჯვებული" უწოდა.