რა ხდება: გუშინ, 6 ნოემბერს, რუსმა ოკუპანტებმა საქართველოს მოქალაქე მოკლეს.

  • უკანონოდ არის დაკავებული კიდევ ერთი პირი.
  • შემთხვევა გორის მუნიციპალიტეტის სოფელ კირბალის მიმდებარედ, ოკუპირებულ ტერიტორიაზე მოხდა.

დეტალები: რუსეთის მიერ საქართველოს მოქალაქის, თამაზ გინტურის მკვლელობას გამოხმაურება მოჰყვა საერთაშორისო საზოგადოებაშიც.

  • ევროკავშირის უმაღლესი წარმომადგენელი საგარეო ურთიერთობებისა და უსაფრთხოების საკითხებში, ჯოზეფ ბორელი გმობს მომხდარს და მოითხოვს, დაუყოვნებლივ გათავისუფლდეს ამჟამად დაკავებული საქართველოს მოქალაქე:
  • "რუსეთის შეიარაღებული ძალების ყოფნა საქართველოს ოკუპირებულ ტერიტორიებზე, აფხაზეთისა და სამხრეთ ოსეთის რეგიონში, უკანონოა", — ამბობს ის.
  • "რუსეთი კლავს. ის კლავს უკრაინაში, სირიაში და რა თქმა უნდა, საქართველოში", — წერს ევროპარლამენტარი, ვიოლა ფონ კრამონი, — საქართველოს აქვს რუსული ოკუპაციის ქვეშ ყოფნის 200-წლიანი გამოცდილება იმისთვის, რათა იცოდეს, რომ მოძალადის დამშვიდება არ მუშაობს".
  • აშშ-ის სახელმწიფო დეპარტამენტის პრესმდივანი, მეთიუ მილერი წერს, რომ მომხდარი ნათელი მაგალითია იმ დესტრუქციისა, რასაც რუსული ოკუპაცია იწვევს.
  • "ამ შემზარავ აქტზე პასუხისმგებლობა სრულად ეკისრება საოკუპაციო ძალებს", — აღნიშნავს ევროპარლამენტარი, მირიამ ლექსმანი.
  • მისი თქმით, მხოლოდ და მხოლოდ რუსეთის მიერ საქართველოს ტერიტორიების ოკუპაციის სრულმა დასრულებამ შეიძლება უზრუნველყოს ის, რომ მსგავსი შემთხვევები აღარ განმეორდეს.
  • თამაზ გინტურის მკვლელობასთან დაკავშირებით მწუხარება და სამძიმარი გამოთქვა ბრიტანეთის ელჩმა საქართველოში, მარკ კლეიტონმაც.
  • "დამწუხრებული ვარ რუსი სამხედროების მიერ სასიკვდილო სროლით საქართველოს მოქალაქის მიმართ", — წერს ევროპის საბჭოს გენერალური მდივანი, მარია პეიჩინოვიჩ-ბურიჩი.
  • საქართველოში გერმანიის ელჩის, პეტერ ფიშერის განცხადებით, რუსეთი აგრძელებს საქართველოს სუვერენიტეტისა და ტერიტორიული მთლიანობის უკანონოდ დარღვევას.
  • "გერმანიის მთავრობის სახელით, გულწრფელ მწუხარებას გამოვთქვამ. საქართველოს შეუძლია ჰქონდეს მისი პარტნიორების მხარდაჭერის იმედი რუსეთის ბოროტი ქმედებების დასასრულებლად", — წერს ფიშერი.
  • მომხდარს გმობს საფრანგეთის ელჩი საქართველოში, შერაზ გასრიც.