სიტკომ Friends-ის მსახიობი და ჩენდლერის როლის შემსრულებელი მეთიუ პერი 28 ოქტომბერს 54 წლის ასაკში გარდაიცვალა. მსახიობმა 2022 წელს მემუარი Friends, Lovers, and the Big Terrible Thing გამოუშვა, რომელშიც ლეგენდარული სიტკომის გადაღებებზეც ისაუბრა და თქვა, რომ უნდოდა, სერიალის ფინალურ ეპიზოდში ბოლო სიტყვები მის პერსონაჟ ჩენდლერს ეთქვა.

მსახიობის თქმით, როცა ბოლო სერიაზე მუშაობდნენ, პერიმ ერთ-ერთ სცენარისტ კაუფმანს უთხრა, რომ სხვა არც ერთი მსახიობისთვის ამას გადამწყვეტი მნიშვნელობა არ ჰქონდა, თვითონ კი ძალიან უნდოდა, რომ სერიალი მისი სიტყვებით დასრულებულიყო.

Friends-ის ბოლო სცენაში ექსივე მეგობარს მონიკას ძველ სახლში ვხედავთ — ისინი ემშვიდობებიან ბინას, რომელიც მთელი სერიალის განმავლობაში შეკრების მთავარი ადგილი იყო, რადგან მონიკა და ჩენდლერი ახალ სახლში გადადიან. ამით ექვსივე მათგანის ცხოვრებაში ახალი ეტაპი იწყება, რაც სცენას კიდევ უფრო სევდიანს ხდის.

სახლიდან გასვლისას რეიჩელი კითხულობს, სადმე ყავა ხომ არ დაელიათ, ჩენდლერი კი პასუხობს: "რა თქმა უნდა, სად?" ეს სერიალში ჩენდლერის ბოლო სარკასტული კომენტარია — სერიალის პერსონაჟები ხომ ყოველთვის ერთსა და იმავე კაფეში — Central Park-ში მიდიოდნენ, ამიტომ პასუხი ისედაც ცხადი იყო.

ფოტო: NBC

"მიყვარს, როგორ მიყურებს დევიდ შვიმერი (როსი) იმ მომენტში, როცა ბოლო სიტყვებს ვამბობ, სიყვარულითა და სიცილით, რადგან Friends-მა სამყაროს სწორედ ეს ორი რამ მისცა", — წერდა პერი.

მსახიობი წერს, რომ ბოლო სცენის გადაღების შემდეგ ჯენიფერ ენისტონმა (რეიჩელი) და მეთ ლებლანკმა (ჯოუი) იტირეს, ის კი თითქოს იმ დროს ვერაფერს გრძნობდა. გადაღების შემდეგ მან თავის მაშინდელ შეყვარებულთან ერთად მთელ გადასაღებ მოედანს შემოუარა და განვლილი 10 წელი გაიხსენა.

"Friends ჩემთვის თავშესაფარი იყო. ადგილი, სადაც თავს მშვიდად ვგრძნობდი. მიზეზი, რის გამოც დილას საწოლიდან ვდგებოდი და რის გამოც ღამით დაძინება მიმარტივდებოდა", — ამბობდა პერი.

მსახიობი პარასკევს, 3 ნოემბერს, ლოს-ანჯელესში Forest Lawn-ის სასაფლაოზე დაკრძალეს, დახურულ ცერემონიას მისი ოჯახი და Friends-ის მსახიობები — ჯენიფერ ენისტონი, კორტნი კოქსი, მეთ ლებლანკი, ლიზა კუდროუ და დევიდ შვიმერი ესწრებოდნენ.

მეთიუს გარდაცვალებას შოუს ხუთეული საერთო განცხადებით გამოეხმაურა, რომელშიც ამბობდნენ, რომ ისინი ერთმანეთისთვის ოჯახი იყვნენ და მეგობრის დაღუპვით განადგურებულები არიან.

იხილეთ ასევე: