როგორ სურდა მეთიუ პერის, რომ ხალხს სიკვდილის შემდეგ დამახსოვრებოდა

მეთიუ პერი გარდაცვალებამდე 1 წლით ადრე პოდკასტში იყო მიწვეული, რომელშიც ცხოვრებისა და კარიერის შესახებ ვრცლად ისაუბრა. ინტერვიუში Friends-ის მსახიობს ისიც ჰკითხეს, თუ როგორ სურდა სიკვდილის შემდეგ ადამიანებს გეხსენებინათ, რაზეც ასე უპასუხა:

"მინდა, ისეთ ადამიანად დამიმახსოვრონ, რომელმაც კარგად იცხოვრა, ბევრ ადამიანს უყვარდა და თავგადასავლების მაძიებელი იყო. რაც მთავარია, მინდა ახსოვდეთ, რომ ადამიანების დახმარება მიყვარდა. ყველაზე კარგი, რისი გაკეთებაც შემიძლია ისაა, რომ თუ ალკოჰოლიკი ან ნარკოტიკებზე დამოკიდებული ადამიანი ჩემთან მოვა და დახმარებას მთხოვს, მე შემიძლია დავთანხმდე და ეს მართლაც გავაკეთო. როცა მოვკვდები, არ მინდა, Friends იყოს პირველი, რაც გაახსენდებათ. მსურს, პირველი ის გაახსენდეთ, რომ ადამიანებს ვეხმარებოდი და ვაპირებ, დარჩენილი ცხოვრება ამის დასამტკიცებლად ვიცხოვრო", — განაცხადა მეთიუ პერიმ.

შეგახსენებთ, რომ მეთიუ პერი 54 წლის ასაკში გარდაიცვალა. მსახიობი ლოს-ანჯელესში, საკუთარ სახლში, გარდაცვლილი იპოვეს, თუმცა ჯერჯერობით მისი გარდაცვალების მიზეზებზე ინფორმაცია ოფიციალურად არ დასტურდება.

"სხვებზე ზრუნვა, ადამიანების დახმარება და ის, რომ არასდროს ვნებდები, ჩემს თავში ალბათ ყველაზე მეტად მომწონს და ვფიქრობ, რომ ასეთ მომენტებში კრეატიულობაა მთავარი. როცა თავს არაკომფორტულად გრძნობ ან შფოთვა გიმძაფრდება, ამ სიტუაციიდან გამოსვლის ერთადერთი გზაა ისაა, რომ კრეატიული უნდა იყო", — დასძინა მეთიუ პერიმ 2022 წლის ინტერვიუში.

მეთიუს გარდაცვალებას Friends-ის ხუთეული უკვე გამოეხმაურა. "ყველანი განადგურებულები ვართ მეთიუს დაკარგვის გამო. ჩვენ ერთმანეთისთვის ბევრად მეტნი ვართ, ვიდრე მხოლოდ Friends-ის მსახიობები. ჩვენ ოჯახი ვართ. ძალიან ბევრი რამის თქმა გვინდა, მაგრამ ახლა უბრალოდ დრო გვჭირდება გლოვისა და ამ წარმოუდგენელი დანაკარგის გასააზრებლად. როცა შეგვეძლება, მეტს ვიტყვით. ახლა ჩვენი ფიქრები მეთიუს ოჯახთანაა, სიყვარულს ვუგზავნით მათ, მეთიუს მეგობრებსა და ყველას მთელ მსოფლიოში, ვისაც ის უყვარდა", — წერენ მსახიობები.

მსახიობის გარდაცვალებას ოჯახთან და ნაცნობებთან ერთად, გულშემატკივრებიც ძალიან მწარედ განიცდიან. სოციალურ ქსელებში მეთიუ პერის შესახებ პოსტები არ წყდება, ცოტა ხნის წინ კი ფანებმა იმ ბინასთან, რომელშიც ჩენდლერი ცხოვრობდა, ყვავილები მიიტანეს.