დეტალები: ფოტოგრაფი დინა ოგანოვა "გადატრიალების" საქმეზე სახელმწიფო უსაფრთხოების სამსახურში დაიბარეს.

  • ოგანოვამ ეს On.ge-სთან დაადასტურა.
  • ოგანოვამ გვითხრა, რომ გამოკითხვაზე მივა საქალაქო სასამართლოში დღეს, 31 ოქტომბერს, სამის ნახევარზე.
  • ფოტოგრაფი ჩვენებას მაგისტრ მოსამართლეს მისცემს.
  • იმავე საკითხთან დაკავშირებით, სუს-ში გამოკითხვაზე უკვე იმყოფებოდნენ ფორმულას ფოტოგრაფი, ვახო ქარელი; კინოპროდიუსერი, თიკო ნადირაშვილი; გამომცემელთა მსოფლიო ასოციაციის ვიცე-პრეზიდენტი, გვანცა ჯობავა და სხვები.

კონტექსტი: 18 სექტემბერს სახელმწიფო უსაფრთხოების სამსახურმა განაცხადა, თითქოს "გარკვეული ჯგუფი", რომლებიც ქვეყნის შიგნით და ფარგლებს გარეთ მოქმედებს, დესტაბილიზაციას, არეულობას და ტერორისტულ აქტს გეგმავს, რომლის მიზანი ხელისუფლების ძალადობრივი გზით შეცვლაა.

  • უწყებამ ისაუბრა ბარიკადების და კარვების ქალაქის მოწყობის გეგმაზე, შესაძლო აფეთქებაზე და ევრომაიდნის სცენარის განვითარების მცდელობაზე.
  • სუს ამტკიცებდა, რომ "დესტრუქციული პროცესების" დაწყების თარიღებად მიმდინარე წლის ოქტომბერ-დეკემბრის პერიოდია შერჩეული, როდესაც ევროკომისიის შუალედური და ევროკავშირის საბოლოო დასკვნა უნდა გამოქვეყნდეს.

რატომ არის მნიშვნელოვანი: ეს პირველი შემთხვევა არ არის, როდესაც უწყება მსგავსი შინაარსის განცხადებას ავრცელებს და აქამდე კონკრეტული შედეგების ან გამოძიების შემდგომი განვითარების შესახებ ინფორმაცია არ გავრცელებულა.

  • უწყებას ამჯერადაც არცერთი მტკიცებულება არ წარმოუდგენია და ბრიფინგზე განცხადების წაკითხვით შემოიფარგლა.
  • არასამთავრობო სექტორი ამას საზოგადოებაში შიშის დათესვის მცდელობად აფასებს და საინფორმაციო მანიპულირებას ადარებს, რაც ავტორიტეტული საზოგადოებისთვის არის დამახასიათებელი.