ქართული სახვითი ხელოვნების მუზეუმის მე-5 დაბადების დღესთან დაკავშირებით, საქართველოში პირველად გაიხსნა საერთაშორისო გამოფენა — ბენქსი: ლეგენდის დაბადება, კურატორი — სტივ ლაზარიდისი. გამოფენის მხარდამჭერები არიან SOLO X და VISA.

ექსპოზიცია ასახავს ბენქსის განვითარების გზას, რომლის იდენტობაც დღემდე უცნობი რჩება. სტივ ლაზარიდისის მიერ ფოტოებით გადმოცემული ისტორია იკვლევს ბენქსის გონებისა და შემოქმედებითი ხედვის სიღრმეებს.

გამოფენა ფართო აუდიტორიისთვის 18 ოქტომბერს გაიხსნა და 14 თებერვლამდე დარჩება თბილისში.

პროექტის კურატორია სტივ ლაზარიდისი, რომელიც ქუჩის ხელოვნების სამყაროში გამოჩენილი ფიგურაა და მხატვრული მოგზაურობის განმავლობაში უცნობი, გავლენიანი ქუჩის მხატვრის მარჯვენა ხელია.

"ეს კონკრეტული მოგზაურობა ბენქსისთან ერთად მუშაობის 11 წელიწადს ეხება, როცა მე მისი ფოტოგრაფი, დოკუმენტალისტი, მძღოლი, აგენტი, მენეჯერი და ყველაფერი ვიყავი. ბენქსის პირველად 1997 წელს შევხვდი, როდესაც ის იწყებდა მუშაობას, როგორც ახალგაზრდა უცნობი გრაფიტის არტისტი ბრისტოლიდან.
ამ გამოფენაზე ნახავთ ბენქსის მიერ განვლილ სრულ გზას. დაათვალიერებთ მის ხელოვნებას ორი პერსპექტივიდან — ჩემ მიერ გადაღებულ დოკუმენტურ ფოტოებს, რომლებიც შეგიქმნით წარმოდგენას იმის შესახებ, თუ საიდან მოვიდა ის, როგორ დაიწყო ყველაფერი და ასევე, ნახავთ ორიგინალებს, რომ გაჩვენოთ, რამდენად გასცდა ბენქსი საზღვრებს და რამდენად უსწრებდა დროს", — ამბობს ექსპოზიციის კურატორი, სტივ ლაზარიდისი.

ბენქსი — ერთდროულად ყველაზე ცნობილი და უცნობი ქუჩის მხატვარი ბრისტოლიდან

საიდუმლოებით მოცული მხატვარი დიდი ხანია, რაც საზოგადოების დიდი ინტერესით სარგებლობს.მისი ნამდვილი ვინაობის შესახებ უამრავი თეორია არსებობს, რაც მის ნამუშევრებს კიდევ უფრო მეტ მისტიკას მატებს. ანონიმურობისადმი მისი უნიკალური მიდგომით მისი მიმდევრები მოხიბლა არამხოლოდ მისმა ხელოვნებამ, ასევე მის გარშემო არსებულმა საიდუმლოებამაც.

ბენქსის ნამუშევრებმა გარდა ვიზუალური ესთეტიკისა, რევოლუცია მოახდინა ქუჩის ხელოვნებაზე, გარდაქმნა ის სოციალური საკითხების შესახებ მსჯელობისა და ცვლილებების მძლავრ ინსტრუმენტად, ხოლო საჯარო სივრცეები გალერეებად აქცია. ნამუშევრებით იგი ეხმიანება ისეთ მნიშვნელოვან საკითხებს, როგორებიცაა: ომები, კონსუმერიზმი, გარემოსდაცვითი პრობლემები და ძალაუფლების თემები. მისი ნახატები, ტექსტები თუ ქვეტექსტები კედელზე გამოჩენისთანავე განხილვის საგანი ხდება და ადამიანებს მათთვის უსიამოვნო თემებზე აფიქრებს.

აღსანიშნავია, რომ მისმა სტილმა დიდი კვალი დაამჩნია თანამედროვე ხელოვნებას და გავლენა მოახდინა ქუჩის მხატვრებისა და ხელოვნების მოძრაობების ახალ თაობაზე, ხოლო მკაფიო განცხადებებმა ბევრი მხატვარი შთააგონა, რომ მათი საქმიანობა სოციალურ-პოლიტიკური საკითხების მიმართ გულგრილი არ ყოფილიყო.

როგორც ლაზარიდისი ამბობს, ექსპოზიციის დათვალიერებისას თავად მიხვდებით თუ რატომ გააღმერთა ბენქსი ხელოვნების სამყარომ და როგორ იქცა ვანდალი არტისტი საკულტო ფიგურად.

ასევე გამოფენაზე შეძლებთ, დაათვალიეროთ ქართველი ქუჩის მხატვრების მიერ შესრულებული ნამუშევრებიც. ესენი არიან: გაგოშა, მიშიკო სულაკაური, სემიჩკა, კოსკა და Sick’nTired.

გამოფენის ბილეთების შეძენა შესაძლებელი იქნება მუზეუმის სალაროში, სადაც SOLO Visa ბარათის მფლობელები 15%-იანი ქეშბექით ისარგებლებენ.