ელენე ნავერიანის ფილმი შაშვი შაშვი მაყვალი 2023 წლის ევროპული კინოაკადემიის ჯილდოს გრძელ სიაში მოხვდა. ჯილდო ევროპელი რეჟისორების წლის საუკეთესო ფილმებს გამოავლენს. დაჯილდოება 9 დეკემბერს გაიმართება.

შაშვი შაშვი მაყვალი თანამედროვე ქართველი მწერლის, თამთა მელაშვილის, იმავე სახელწოდების რომანის მიხედვით გადაიღეს და მისი ერთ-ერთი სცენარისტი თავად მელაშვილია, რეჟისორი კი ელენე ნავერიანი. ფილმში მთავარ როლებს ცნობილი მსახიობები ეკატერინე ჩავლეიშვილი და თემიკო ჭიჭინაძე ასრულებენ. ფილმის პრემიერა კინოთეატრებში 12 ოქტომბერს შედგა.

შაშვი შაშვი მაყვალი პატარა ტრადიციულ ქართულ სოფელში მცხოვრებ, შუახნის ასაკის დაუქორწინებელ ქალ ეთეროზე გვიყვება, რომელსაც საყოფაცხოვრებო ნივთების მაღაზია აქვს. იგი ტკბება საკუთარი თავისუფლებითა და მშვიდი და კომფორტული სიბერისთვის ემზადება, თუმცა მოულოდნელად დაწყებული სასიყვარულო ურთიერთობა ეთეროს გეგმებს თავდაყირა აყენებს.

ცოტა ხნის წინ, ბათუმის კინოფესტივალზე ფილმმა ჟიურის სპეციალური ჯილდო დაიმსახურა, ეკატერინე ჩავლეიშვილი კი საუკეთესო მსახიობ ქალად დასახელდა. ფილმმა საერთაშორისო აღიარებაც მოიპოვა — შაშვი შაშვი მაყვალი მიშკოლცის საერთაშორისო კინოფესტივალზე 3 პრიზის მფლობელი გახდა. ჟიურიმ ფილმს შესანიშნავი რეჟისორული და კინემატოგრაფიული ნამუშევარი უწოდა და მსახიობ ეკატერინე ჩავლეიშვილის დასამახსოვრებელ შესრულებასაც გაუსვა ხაზი.

ამასთან, ერთ-ერთ ყველაზე პრესტიჟულ ევროპულ კინოდაჯილდოებაზე, სარაევოს კინოფესტივალზე, ელენე ნავერიანის შაშვი შაშვი მაყვალი საუკეთესო სრულმეტრაჟიან ფილმად დასახელდა. აღსანიშნავია, რომ ფესტივალის პრიზის — "სარაევოს გულის" — მფლობელი ასევე გახდა ნავერიანის ფილმში მთავარი როლის შემსრულებელი ეკატერინე ჩავლეიშვილი, რომელიც საუკეთესო მსახიობ ქალად დაასახელეს.

მელაშვილის ამ ბესტსელერად ქცეულმა წიგნმა 2021 წელს პრემია საბაც მიიღო წლის საუკეთესო რომანის ნომინაციაში. ნაწარმოების მიხედვით ზუგდიდის შალვა დადიანის სახელობის პროფესიულ სახელმწიფო დრამატულ თეატრში დაიდგა სპექტაკლიც.