რა ხდება: ნაადრევი ქორწინების მსხვერპლი, 14 გოგო "ქმარმა" 6 ოქტომბერს, ცეცხლსასროლი იარაღით მოკლა.

  • შემთხვევის შემდეგ ის ადგილიდან მიიმალა. პოლიციამ მისი დაკავება 10 ოქტომბერს მოახერხა.
  • მას ბრალი ედება არასრულწლოვანი ოჯახის წევრის მიმართ, გენდერის ნიშნით ჩადენილ განზრახ მკვლელობასა და იარაღის უკანონოდ ტარებაში.
  • დანაშაული 16-დან 20 წლამდე ან უვადო თავისუფლების აღკვეთას ითვალისწინებს.

დეტალები: რუსთავის საქალაქო სასამართლომ 14 წლის გოგოს მკვლელობის საქმეზე მოკლულის დედას და ბიძას პატიმრობა შეუფარდა.

  • პროკურატურის ცნობით, მათ ბრალი ედებათ ქორწინების იძულებასა და დანაშაულის შეუტყობინებლობაში.
  • უწყების მტკიცებით, გამოძიებით დადგინდა, რომ არასრულწლოვანს ქორწინების იძულების მიზნით, გამტაცებელმა უკანონოდ აღუკვეთა თავისუფლება და შეუზღუდა გადაადგილების თავისუფლება.
  • მან მოახერხა გაქცევა და უცხო პირის ტელეფონით დედას დაუკავშირდა, რაც ცნობილი გახდა არასრულწლოვნის ბიძისთვისაც.
  • როგორც პროკურატურაში ამბობენ, მიუხედავად ამისა, დედამ და ბიძამ აღნიშნული ფაქტი სამართალდამცავ ორგანოებს არ შეატყობინეს და ბავშვს გამტაცებელთან თანაცხოვრება აიძულეს.

სახალხო დამცველის განცხადებით, ქვეყანაში კვლავ პრობლემად რჩება როგორც ბავშვთა ქორწინების შემთხვევები, ასევე, ქორწინების იძულების ფაქტები.

  • "სახელმწიფოს მიერ გადადგმული ნაბიჯები ადრეულ ასაკში ქორწინებისა და ფემიციდის შემთხვევებზე არასაკმარისია და საჭიროებს სისტემურ და კოორდინირებულ მუშაობას როგორც ცენტრალურ, ასევე ადგილობრივ დონეზე", — აღნიშნულია ომბუდსმენის განცხადებაში.

გარდა ამისა, მომხდართან დაკავშირებით, 15 ოქტომბერს, 20:00 საათზე, პარლამენტთან მდუმარე აქცია სახელმწოფებით "ბავშვი ცოლი არ არის" გაიმართება.

  • "ჩვენ, მოქალაქეები და არასამთავრობო ორგანიზაციები, გამოვხატავთ სოლიდარობას არამხოლოდ გარდაცვლილი მოზარდის მიმართ, არამედ დახმარებასა და მხარდაჭერას ვთავაზობთ იმ ბავშვებსა თუ ქალებს, რომლებიც ახლაც, ამ წამსაც, განიცდიან ნებისმიერი სახის ძალადობას", — აღნიშნულია აქციის ორგანიზატორთა განცხადებაში.