ამერიკის შეერთებული შტატები ოფიციალურად იწყებს პროცესს, რომელიც სირიისთვის "ტერორიზმის სპონსორი სახელმწიფოს" (SST) სტატუსის გაუქმებას ითვალისწინებს. აღნიშნულ გადაწყვეტილებასთან დაკავშირებით აშშ-ის სახელმწიფო მდივანმა, მარკო რუბიომ საგანგებო განცხადება გაავრცელა.

სახელმწიფო დეპარტამენტის ხელმძღვანელის განმარტებით, პრეზიდენტმა დონალდ ტრამპმა კონგრესს უკვე აცნობა ადმინისტრაციის ამ განზრახვის შესახებ, რაც ვაშინგტონსა და დამასკოს შორის ორმხრივი ურთიერთობების აღდგენისკენ გადადგმული ისტორიული ნაბიჯია.

განცხადებაში ასევე აღნიშნულია, რომ აშშ-ის კანონმდებლობის თანახმად, კონგრესისთვის ოფიციალური შეტყობინების გაგზავნის შემდეგ იწყება 45-დღიანი პერიოდი, რომლის ამოწურვის შემდეგაც სირიას აღნიშნული სტატუსი საბოლოოდ მოეხსნება, რაც ქვეყანას საერთაშორისო სანქციებისგან გაათავისუფლებს და ეკონომიკური რეკონსტრუქციის შესაძლებლობას მისცემს.

"დღეს პრეზიდენტმა ტრამპმა აშშ-ის კონგრესს თავისი ადმინისტრაციის განზრახვის შესახებ აცნობა, გააუქმოს სირიისთვის "ტერორიზმის სპონსორი სახელმწიფოს" (SST) სტატუსი, რაც ძალაში 45-დღიანი წინასწარი შეტყობინების პერიოდის შემდეგ შევა. ეს არის კიდევ ერთი ისტორიული ნაბიჯი პრეზიდენტ ტრამპის მხრიდან, რათა სირიელ ხალხს განვითარებისა და წარმატების შანსი მისცეს.

სირიისთვის სანქციების მოხსნა გზას გაუხსნის საერთაშორისო ვაჭრობასა და ინვესტიციებს, მისცემს ქვეყანას აღდგენის შესაძლებლობას და ახალ ფურცელს გადაშლის სირიელი ხალხის ისტორიაში. სტაბილური, ერთიანი სირია, რომელიც მშვიდობიანად თანაარსებობს საკუთარ თავსა და მეზობლებთან, სარგებელს მოუტანს არა მხოლოდ რეგიონს, არამედ მთელ მსოფლიოს.

სტატუსის გაუქმება ეფუძნება პრეზიდენტ ტრამპის 2025 წლის 30 ივნისის აღმასრულებელ განკარგულებას, რომელიც სირიისთვის სანქციების შემსუბუქებას ითვალისწინებს. ეს გადაწყვეტილება ასევე უკავშირდება იმ პოზიტიურ ცვლილებებსა და ანტიტერორისტულ ზომებს, რომლებსაც სირიის მთავრობამ მიმართა პრეზიდენტ აჰმედ ალ-შარაას ხელმძღვანელობით, და თავად პრეზიდენტ ალ-შარაას მიერ წარდგენილ ოფიციალურ გარანტიებს, რომ სირია მომავალში მხარს არ დაუჭერს საერთაშორისო ტერორისტულ აქტებს.

დღევანდელი დღე მნიშვნელოვანი ეტაპია აშშ-სირიის განახლებულ ორმხრივ ურთიერთობებსა და სირიის, როგორც ერის, ისტორიაში. ჩვენ მივესალმებით სირიის მთავრობის მიერ ახალი კურსის აღებას და იმედით ვუყურებთ სირიასთან და მის ხალხთან პარტნიორობის გაღრმავებას", — აღნიშნულია მარკო რუბიოს განცხადებაში.