პარლამენტის პირველი ვიცესპიკერი გია ვოლსკი ეუთო-ს ასამბლეის მიერ მიღებულ რეზოლუციას ეხმაურება და მას ქვეყნის მიმართ უსამართლოს უწოდებს. მისი თქმით, დოკუმენტის მიღმა გარკვეული პოლიტიკური ინტერესების მქონე მცირე ჯგუფი დგას, რის გამოც ქართულმა დელეგაციამ რეზოლუციას მხარი არ დაუჭირა.

ვოლსკი ხაზს უსვამს, რომ არჩევნების ელექტრონული სისტემა გაყალბებას პრაქტიკულად გამორიცხავს, ხოლო ოპოზიციისა და პრეზიდენტის ბრალდებები აბსურდულია და ფაქტებით დადასტურებული არ არის.

ვოლსკი პასუხობს რეზოლუციაში პოლიტპატიმრების თემის მოხვედრასაც და აცხადებს, რომ დასავლეთში ზუსტად იციან რუსთაველის გამზირზე მიმდინარე აქციების ძალადობრივი ხასიათისა და მოლოტოვის კოქტეილების გამოყენების შესახებ. მისივე განმარტებით, დოკუმენტში ბევრი ისეთი პუნქტი იყო, რომელსაც საქართველო სიამოვნებით დაუჭერდა მხარს, თუმცა მცირე ჯგუფის მიერ შეტანილი უსამართლო ცვლილებების გამო, დელეგაციამ რეზოლუციას ხმა არ მისცა.

"საქმე იმაშია, რომ ეუთო-ს ის სტრუქტურა, რომელიც არჩევნებთან დაკავშირებულ საკითხებზე მსჯელობდა, საქართველოში ჩატარებულ არჩევნებს დადებითად ახასიათებს და პოზიტიურ შეფასებებს აძლევს. ცენტრალური საარჩევნო კომისიის საქმიანობა ყველა კომისიამ ძალიან დადებითად შეაფასა.

არჩევნების ელექტრონულ სისტემაზე გადაყვანა არის ის ნაბიჯი, რომელიც პრაქტიკულად გამორიცხავს ნებისმიერ გაყალბებას. გაყალბების არცერთი ფაქტი, რაზეც სალომე ზურაბიშვილი ან სხვები საუბრობდნენ, დადასტურებული არ არის. ათასობით დამკვირვებელი იყო და მათგან არცერთი არ ამბობს, რომ არჩევნები გაყალბდა. ეუთო-მ ამ რეზოლუციით პრაქტიკულად წერტილი დაუსვა საკუთარ, ეუთო\ოდირის სადამკვირვებლო მისიის ავტორიტეტს. ისინი არჩევნების გაყალბებაზე საუბრობენ მაშინ, როდესაც ამის არანაირი ფაქტი არ გააჩნიათ. საუბრობენ პოლიტპატიმრებზეც, თუმცა ზუსტად იციან, რომ ამ ადამიანებს, მიუხედავად მათი პოლიტიკური სტატუსისა, კონკრეტული დანაშაულები აქვთ ჩადენილი. ზუსტად იციან, რომ რუსთაველის გამზირზე ცეცხლი ენთო და ეს არ ყოფილა მშვიდობიანი მიტინგი, რადგან "მოლოტოვის კოქტეილს" ისროდნენ. ასევე, იციან ის შეფასებებიც, რომლებიც ავტორიტეტულმა ორგანიზაციებმა გააკეთეს საქართველოსთან დაკავშირებით — რომ ქვეყანა ყველა მაჩვენებლით მაღალ დონეზეა, თუმცა რეზოლუციას მაინც ასეთი სახით აკეთებენ. ფაქტია, რომ ამის უკან დგას გარკვეული პოლიტიკური ინტერესი, რომელიც ერთ პატარა ჯგუფს გააჩნია, თუმცა ეს ჯგუფი განაპირობებს კენჭისყრის შედეგს. როდესაც 230-ზე მეტი ადამიანიდან რეზოლუციაში გარკვეულ ცვლილებას მხარს მხოლოდ 38 უჭერს, აქედან შესაბამისი დასკვნები უნდა გაკეთდეს", — განაცხადა ვოლსკიმ (კომენტარს IPN ავრცელებს).

შეგახსენებთ, საქართველოს დელეგაციამ უარი თქვა ეუთო-ს საპარლამენტო ასამბლეაზე გამართულ კენჭისყრაში მონაწილეობაზე, სადაც საქართველოს საკითხზე კრიტიკული რეზოლუცია მიიღეს. მათ სხდომა პროტესტის ნიშნად დატოვეს.

პარლამენტის საგარეო ურთიერთობათა კომიტეტის თავმჯდომარის ნიკოლოზ სამხარაძის განცხადებით, დეკლარაციის შესწორებული ვერსიის ცალკეული ნაწილები განზრახ ამახინჯებს საქართველოში არსებულ პოლიტიკურ რეალობას.

ცნობისთვის, ეუთო-ს საპარლამენტო ასამბლეამ, 8 ივლისს მიიღო რეზოლუცია "საქართველოში საარჩევნო კეთილსინდისიერებისა და ფუნდამენტური თავისუფლებების დაცვის შესახებ", რომლის ინიციატორი ამერიკელი კონგრესმენი ჯო უილსონია.