რა მოხდა: 7 ოქტომბერს, ადგილობრივი დროით 06:30 საათზე, ღაზადან ისრაელის მიმართულებით რამდენიმე სარაკეტო თავდასხმა განხორციელდა.

• ამაზე პასუხისმგებლობა დაჯგუფება ჰამასმა აიღო. მათი თქმით, ეს არის შურისძიება ისრაელის მიერ ალ-აქსას მეჩეთის შეურაცხყოფის გამო.
• ისრაელის თავდაცვის ძალებმა ჯარისკაცების მობილიზება დაიწყეს და საომარი მდგომარეობა გამოაცხადეს.
• ისრაელის თავდაცვის მინისტრმა განაცხადა, რომ ჰამასის დაჯგუფებამ მათ წინააღმდეგ ომი წამოიწყო და პირობა დადო, რომ ისრაელი გაიმარჯვებს.
• ისრაელის თავდაცვის ძალების ინფორმაციით, ჰამასმა მათი მიმართულებით 2000-ზე მეტი რაკეტა ისროლა.
• მალე გავრცელდა ინფორმაცია, რომ ჰამასმა ისრაელის სამხედროები და მათ შორის, სამოქალაქო პირებიც მძევლად აიყვანა და ღაზის სექტორში გადაიყვანა.
• მოგვიანებით, ეს ინფორმაცია დაადასტურა ჰამასმაც და ისრაელის თავდაცვამაც.

დეტალები: სროლები იყო ღაზა-ისრაელის საზღვრის იმ ნაწილშიც, სადაც მუსიკალური ფესტივალი მიმდინარეობდა.

• ფესტივალის ერთ-ერთმა მონაწილემ CNN-ს უთხრა, რომ მოულოდნელად მუსიკის ხმა შეწყდა და სირენებისა და სროლის ხმა გაისმა.
• თავდასხმის შედეგად ფესტივალის მონაწილეების ნაწილი დაიღუპა, ნაწილი ჰამასის წევრებმა მძევლად აიყვანეს. ზოგმა გაქცევა და დამალვა მოახერხა.
• ჰამასი ღამის განმავლობაში ბომბავდა ისრაელის ქალაქებს, მათ შორის, თელ-ავივსაც.
• ბოლო ოფიციალური მონაცემებით, ისრაელში, ჰამასის თავდასხმის შედეგად დაღუპულთა რიცხი 350-მდე გაიზარდა. დაშავებულია 2000-ზე მეტი ადამიანი.
• "ჩვენ შურს ვიძიებთ ამ შავი დღისთვის", — თქვა ისრაელის პრემიერმინისტრმა, ბენიამინ ნეთანიაჰუმ.

ისრაელის კონტრშეტევა: ჰამასის თავდასხმების შემდეგ, ისრაელმა წამოიწყო ოპერაცია "რკინის ხმლები".

• პრემიერმინისტრმა, ნეთანიაჰუმ ღაზას მოსახლეობას მოუწოდა ტერიტორიის დატოვებისკენ და გააფრთხილა, რომ იწყებდა ოპერაციას, რომელის მიზანიც იყო ყველა იმ ადგილის განადგურება, სადაც ჰამასი იყო დაფუძნებული.
• თავდასხმების ფონზე, პრემიერმინიტრმა მოუწოდა ოპოზიური პარტიის ლიდერებს გაერთიანებულიყვნენ საგანგებო დროებით მთავრობაში.
• თავდასხმის საპასუხოდ, ისრაელი მთელი ღამის განმავლობაში ბომბავდა ღაზას.
• პალესტინის განცხადებით, სროლების შედეგად დაიღუპა, სულ მცირე, 256 პალესტინელი, მათ შორის, 20 ბავშვი.
• დაშავებულია 2000-მდე პალესტინელი.

გარდა ამისა, 8 ოქტომბერს, დილით ლიბანიდან ისრაელის მიმართულებით საარტილერიო თავდასხმა განახორციელა შეიარაღებულმა დაჯგუფება ჰეზბოლამ.

• ჰეზბოლას განცხადებით, ეს იყო ჰამასის მიმართ სოლიდარობის გამოხტვა.
• ჰეზბოლას მიმართ საპასუხო თავდასხმა იყო ისრაელის მხრიდანაც.

გამოხმაურებები: ჰამასის მოულოდნელ თავდასხმას ისრაელზე მსოფლიო ლიდერები გამოეხმაურნენ.

• "ეს არის ტერორიზმი მისი ყველაზე საზიზღარი ფორმით. ისრაელს აქვს უფლება დაიცვას თავი ასეთი საშინელი თავდასხმებისგან", — წერს ტვიტერზე ევროპარლამენტარი, ურსულა ფონ დერ ლაიენი.
• ევროკავშირის უმაღლესმა წარმომადგენელმა საგარეო ურთიერთობებისა და უსაფრთხოების საკითხებში, ჯოზეფ ბორელმა განაცხადა, რომ ევროკავშირი სოლიდარობას უცხადებს ისრაელს.
• "მტკიცედ ვგმობთ ისრაელისა და მისი ხალხის წინააღმდეგ ამ დილით განხორციელებულ თავდასხმებს, ჩემი ფიქრები დაზარალებულებთანაა", — წერს ევროპული საბჭოს პრეზიდენტი, შარლ მიშელი.
• უკრაინის პრეზიდენტი, ვოლოდიმირ ზელენსკი წერს, რომ ისრაელს აქვს თავდაცვის უფლება.
• "ვუსამძიმრებ ყველას, ვინც ტერაქტისას ახლობლები დაკარგა. ჩვენ ვგმობთ ტერორიზმის ყველა ფორმას", — აღნიშნულია ზელენსკიც განცხადებაში.
• ჰამასის თავდასხმა ისრაელზე დაგმო გერმანიის საგარეო საქმეთა მინისტრმა, ანალენა ბერბოკმაც.
• "შოკირებული ვარ ჰამასის ტერორისტების მიერ, ამ დილით, ისრაელის მოქალაქეების წინააღმდეგ განხორციელებული თავდასხმით", — წერს დიდი ბრიტანეთის პრემიერმინისტრი, რიში სუნაკი.
• აშშ-ის პრეზიდენტის, ჯო ბაიდენის განცხადებით, მისი ადმინისტრაციის მხარდაჭერა ისრაელის უსაფრთხოებაზე არის მტკიცე და ურყევი.

საჭიროების შემთხვევაში, საქართველოს მოქალაქეებს შეუძლიათ დარეკონ საელჩოს ცხელ ხაზზე:

• +972526919092
• +972 52-8888513
• +972 54-7386813