რატომ არის მნიშვნელოვანი: 30 მაისს ბრატისლავაში გლობალური უსაფრთხოების სამიტზე მყოფმა საქართველოს პრემიერმინისტრმა რუსეთის უკრაინაში შეჭრის მიზეზად ნატოს გაფართოება დაასახელა, რითაც კრემლის ნარატივი გაიმეორა.

  • ასევე, არ უპასუხა მკაფიოდ კითხვას, იყო თუ არა აგვისტოს ომი პროვოცირებული, ამის ნაცვლად თქვა, რომ დეტალებზე საუბრისგან თავს შეიკავებს და ქართული ოცნება 2008 წელს ხელისუფლებაში რომ ყოფილიყო, "ამის ასაცილებლად ყველაფერს გააკეთებდა".
  • ღარიბაშვილის ამ განცხადებებს საქართველოში პროტესტი მოჰყვა და აქტივისტები რამდენიმე დღის განმავლობაში პარლამენტის წინ იკრიბებოდნენ.
  • რა დროსაც შსს-ს თანამშრომლები უხეშად და გაუმართლებლად ერეოდნენ შეკრებისა და მანიფესტაციის თავისუფლებაში.
  • გავრცელდა კადრები, რომლებშიც ჩანდა, რომ აქტივისტებთან პოლიცია მივიდა, პლაკატები დაუხია და დაკავება დაიწყო.
  • ზოგიერთ აქტივისტს პლაკატზე "ირაყლი" ეწერა, ზოგი კი საერთოდ ცარიელი ფურცლით იდგა, რის გამოც პოლიცია მათ აკავებდა.
  • ამის შემდეგ თბილისის სხვადასხვა უბნებში გამოჩნდა წარწერები "ირაყლი", "ბატონო ბიძინი, ირაყლის მეძახიან".

დეტალები: თეთრი ფურცლისა და "ირაყლის" პოსტერის გამო დაკავებულები სასამართლომ წვრილმანი ხულიგნობის მუხლით 500-500 ლარით დააჯარიმა.

  • 2 ივნისს დაკავებული აქტივისტების შესახებ ეს გადაწყვეტილება თბილისის საქალაქო სასამართლომ დღეს, 27 სექტემბერს გამოაცხადა.
  • "ეს გადაწყვეტილება არ გვეხება მხოლოდ ჩვენ, ვინც ჩვენი საქმიანობის გამო დაგვაკავეს, გაგვასამართლეს და დაგვსაჯეს. გადაწყვეტილება ეხება ყველას, რადგან ეს ქმედებები უკანონოდ გამოცხადდა ყველასთვის მომავალში", — წერს ერთ-ერთი დაჯარიმებული, ედუარდ მარიკაშვილი.