ახალგაზრდა იურისტთა ასოციაციის ცნობით, დღეს, თბილისის საქალაქო სასამართლომ (ფსიქოლოგიური) ძალადობის მსხვერპლი ქალის დასაცავად ექვს თვემდე ვადით დამცავი ორდერი გამოსცა.

საკითხი ეხებოდა სტამბოლის კონვენციიდან გამომდინარე კანონმდებლობაში ამოქმედებულ ახალ ცვლილებებს, რომლის მიხედვითაც, დამცავი ორდერი შეიძლება გამოიცეს ოჯახის მიღმა, ქალის მიმართ განხორციელებული ძალადობის საქმეზეც.

არასამთავრობო ორგანიზაციის ინფორმაციით, ქალი იყო მამაკაცის მხრიდან ფსიქოლოგიური ძალადობის მსხვერპლი:

"მის მიმართ ადგილი ჰქონდა ადევნებას, რაც გულისხმობს დაზარალებულთან არასასურველი კომუნიკაციის დამყარებასა და უკანონო თვალთვალს, რომელიც იწვევს პირის ფსიქიკურ ტანჯვას და აიძულებს მნიშვნელოვნად შეცვალოს ცხოვრების წესი".

2017 წლის პირველ ივნისამდე არსებული რეგულაციით მსხვერპლს არ შეეეძლო, შემაკავებელი ან დამცავი ორდერის გამოყენებით დაეცვა თავი და არ არსებობდა სისხლის სამართლის ნორმა, რომელიც მის წინააღმადეგ ჩადენილი ქმედებას ადევნებად შეაფასებდა.