რატომ არის მნიშვნელოვანი: გასულ წელს უკრაინამ წარმატებული კონტრშეტევა განახორციელა და რუსული ძალები კიევიდან ჩრდილო-აღმოსავლეთის, ასევე, სამხრეთით, ხერსონის რეგიონის ტერიტორიებზე დაამარცხა.

  • ოკუპანტები კვლავ იკავებენ აღმოსავლეთის, სტრატეგიულად მნიშვნელოვანი სამხრეთისა და ყირიმის ნახევარკუნძულის ნაწილებს.
  • მორიგი კონტრშეტევა უკრაინამ ზაფხულში წამოიწყო — ოფიციალური პირები ფრონტის ხაზზე გარკვეულ წინსვლაზე საუბრობენ.
  • უკრაინის თავდაცვის სამინისტროს ინფორმაციით, მათმა შეიარაღებულმა ძალებმა დონეცკის ოლქის სოფელი უროჟაინოე გაათავისუფლეს.
  • როგორც Forbes წერს, კონტრშეტევის 13 კვირის განმავლობაში უკრაინის არმიამ 71 ლეოპარდიდან მხოლოდ 5 დაკარგა, 10 კი დაზიანდა.

დეტალები: შეიარაღებული ძალების გენერალური შტაბის ინფორმაციით, წარმატებას მიაღწიეს ზაპოროჟიეშიც — ნოვოდანილივკა-ვერბოვეს ტერიტორიებზე.

  • განცხადებაში აღნიშნულია, რომ ისინი საარტილერიო ცეცხლს უხსნიან მოწინააღმდეგეთა სამიზნეებს.
  • ბახმუტის მიმართულებით თავდაცვის ძალები შეტევითი ოპერაციებს აგრძელებენ და ქალაქის სამხრეთით მიღწეულ სამიზნეებს აძლიერებენ.
  • გენერალური შტაბი აცხადებს, რომ მტერმა წარუმატებელი შეტევითი ოპერაციები ჩაატარა დონეცკის ოლქის ავდიივკასა და მარინკას რაიონებში.
  • გარდა ამისა, ვრცელდება ინფორმაცია, რომ უკრაინის შეიარაღებული ძალების ჯარისკაცებმა ხერსონის რეგიონში, დნეპრის მარცხენა სანაპიროზე, იმ ტერიტორიაზე, რომელიც ახლა "ნაცრისფერი ზონაა", ეროვნული დროშა აღმართეს.

აზოვის ბატალიონის დაბრუნება: აზოვსტალის მცველები რუსეთმა ტყვედ 2022 წლის 17 მაისს აიყვანა, ამავე წლის სექტემბერში, რუსეთსა და უკრაინას შორის სამხედრო ტყვეების გაცვლის პირობებით, აზოვის მებრძოლები, მათ შორის, მეთაური, დენის პროკოპენკო, თურქეთში გაგზავნეს.

  • ისინი ომის დასრულებამდე იქ უნდა დარჩენილიყვნენ, თუმცა 2023 წლის ივლისში აზოველები თურქეთში მყოფ ვლადიმირ ზელენსკისთან ერთად სამშობლოში დაბრუნდნენ.

  • რუსეთმა თურქეთი და უკრაინა შეთანხმების დარღვევაში დაადანაშაულა.

  • 17 აგვისტოს, ცნობილი გახდა, რომ აზოვის ბატალიონი აღდგა და ფრონტის ხაზზე დაბრუნდა.
  • უკრაინის ეროვნული გვარდიის წარმომადგენლის თქმით, აზოვის მებრძოლები საიმედოდ იკავებენ თავიანთ პოზიციებს და გამანადგურებელ ზარალს აყენებენ მტერს.