ორი კვირის წინ, 15 ივნისს საქართველოს კომუნიკაციების ეროვნულმა კომისიამ რუსთავი 2 არასაარჩევნო პერიოდში პოლიტიკური რეკლამის განთავსების გამო გააფრთხილა. საერთაშორისო გამჭვირვალობა - საქართველოში ამბობენ, რომ გადაწყვეტილება პრეცენდენტული იყო, რითაც, ფაქტობრივად, ტელევიზიებს არასაარჩევნო პერიოდში პოლიტიკური რეკლამის განთავსება აეკრძალათ.

არასამთავრობო ორგანიზაციაში მიაჩნიათ, რომ არასაარჩევნო პერიოდში პოლიტიკური რეკლამა არ უნდა იყოს აკრძალული, მაგრამ მისი განთავსება გარკვეული რეგულირების ქვეშ უნდა იყოს მოქცეული. მათი აზრით, არასაარჩევნო პერიოდშიც იგივე მოთხოვნები უნდა გავრცელდეს პოლიტიკურ რეკლამაზე, რაც საარჩევნო პერიოდში ვრცელდება.

საერთაშორისო გამჭვირვალობა - საქართველოში გაიხსენეს ტელეკომპანია რუსთავი 2-ის არგუმენტები, რის გამოც მიაჩნდათ, რომ კანონი არ დაურღვევიათ. ტელევიზიის წარმომადგენელი ამბობდა, რომ მსგავსი აკრძალვის შესახებ კანონში არ წერია და არც მსგავსი მიზანი დევს. კომისიაში კი მიაჩნიათ, რომ არასაარჩევნო პერიოდში პოლიტიკური პარტიის მიერ მაუწყებლის დაფინანსების აკრძალვა ემსახურება მაუწყებლის დაცვას პოლიტიკური პარტიის გავლენისგან, მაუწყებლის მიუკერძოებლობის, ასევე, თავისუფალი და პლურალისტული დებატის უზრუნველყოფას, რაც აძლიერებს დემოკრატიულ საზოგადოებაში გამოხატვის თავისუფლების ფუნდამენტურ როლს.

ორგანიზაციაში ამბობენ, რომ არასაარჩევნო პერიოდში პოლიტიკური რეკლამების სხვა არხებზეც გავრცელებულა.