ერთ-ერთ ყველაზე პრესტიჟულ ევროპულ კინოდაჯილდოებაზე, სარაევოს კინოფესტივალზე, ელენე ნავერიანის შაშვი შაშვი მაყვალი საუკეთესო სრულმეტრაჟიან ფილმად დასახელდა. თამთა მელაშვილის ამავე სახელწოდების მქონე რომანის ეკრანიზაცია სარაევოს რიგით 29-ე კინოფესტივალზე სხვადასხვა ქვეყნიდან მოწვეული მსახიობებითა და რეჟისორებით დაკომპლექტებულმა ჟიურიმ შეაფასა.

აღსანიშნავია, რომ ფესტივალის პრიზის — "სარაევოს გულის" — მფლობელი ასევე გახდა ნავერიანის ფილმში მთავარი როლის შემსრულებელი ეკატერინე ჩავლეიშვილი, რომელიც საუკეთესო მსახიობ ქალად დაასახელეს.

ფოტო: Sarajevo Film Festival

ფოტო: Sarajevo Film Festival

თამთა მელაშვილის რიგით მესამე რომანის კინოადაპტაციაზე მუშაობა წიგნის გამოცემიდან სულ რამდენიმე თვეში, 2021 წლის შემოდგომაზე დაიწყო. მაშინ ნავერიანმა განაცხადა, რომ ნაწარმოების წაკითხვისთანავე წარმოიდგინა, "როგორი შთამბეჭდავი, გამაძლიერებელი და წინააღმდეგობრივი იქნებოდა ამ ისტორიის ეკრანზე ხილვა".

ელენე ნავერიანმა სამადლობელ სიტყვაში აღნიშნა, რომ პრიზს ქართულ კინოს უძღვნიდა, რომელიც ახლა რთულ მდგომარეობაშია. ამ ჟესტით გამოეხმაურა რეჟისორი კინოცენტრში მიმდინარე მოვლენებსა და მოძრაობას "ქართული კინო საფრთხეშია".

შაშვი შაშვი მაყვალი პატარა ტრადიციულ ქართულ სოფელში მცხოვრებ, შუახნის ასაკის დაუქორწინებელ ქალ ეთეროზე გვიყვება. ეთეროს რუტინად ქცეულ ყოველდღიურობას ერთხელაც ჯერ უსიამოვნო ინციდენტი, მერე კი მოულოდნელად მიღებული გადაწყვეტილება არღვევს. მელაშვილის ამ ბესტსელერად ქცეულმა წიგნმა 2021 წელს პრემია საბაც მიიღო წლის საუკეთესო რომანის ნომინაციაში. ნაწარმოების მიხედვით ზუგდიდის შალვა დადიანის სახელობის პროფესიულ სახელმწიფო დრამატულ თეატრში დაიდგა სპექტაკლიც.

რაც შეეხება ელენე ნავერიანს, შაშვი შაშვი მაყვალი მისთვისაც მესამე სრულმეტრაჟიანი კინონამუშევარია. მანამდე მას გადაღებული აქვს ფილმები მე მზის წვეთი ვარ დედამიწაზე და სველი ქვიშა, რომლებმაც საერთაშორისო აღიარება დაიმსახურეს. როგორც ჩანს, იმავე გზას ადგას რეჟისორის ახალი ფილმიც, რომელიც წლევანდელი კანის კინოფესტივალის დამოუკიდებელ სექციაშიც მოხვდა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...