18 აგვისტო საქართველოს ეროვნული გმირის, გიორგი ანწუხელიძის დაბადების დღეა. გიორგი ანწუხელიძე დღეს 39 წლის გახდებოდა. გიორგი ანწუხელიძე 2008 წლის აგვისტოს ომის დროს რუს ოკუპანტებს ტყვედ ჩაუვარდა. 2008 წლის ნოემბრამდე გიორგი ანწუხელიძე უგზო-უკვლოდ დაკარგულად ითვლებოდა. მოგვიანებით კი, ცხინვალიდან ქართველების ცხედრების გადმოსვენების შემდეგ ექსპერტიზით დადგინდა, რომ ერთ-ერთი მათგანი გიორგი ანწუხელიძე იყო.

2009 წლის იანვარში გიორგი ანწუხელიძის წამების კადრები ინტერნეტში გავრცელდა. რუსმა ოკუპანტებმა ანწუხელიძე აწამეს, რის შემდეგაც ცხინვალის მეხუთე სკოლასთან, ძმათა სასაფლაოზე ცემით მოკლეს.

2013 წელს გიორგი ანწუხელიძეს საქართველოს ეროვნული გმირის წოდება მიენიჭა. 2009 წელს გიორგი ანწუხელიძეს ვახტანგ გორგასლის I ხარისხის ორდენიც მიენიჭა. 2011 წელს კი, საქართველოს თავდაცვის სამინისტრომ გიორგი ანწუხელიძე "სამშობლოსთვის თავდადებულის" მედლით დააჯილდოვა. "თუშების სადროშომ" გიორგი ანწუხელიძეს "თუში სახალხო გმირის" წოდება მიანიჭა და სოფელ ქვემო ალვანში გიორგი ანწუხელიძის მემორიალიც გაიხსნა.