სცენარები მხოლოდ მსახიობებისა და ფილმის შემოქმედებითი გუნდის სხვა წევრებისთვის როდი იწერება. ბოლო წლებში წიგნებად გამოცემულ კინოსცენარებს უამრავი მკითხველი გამოუჩნდა. სხვა თუ არაფერი, ჯადოსნური ცხოველების სცენარების პოპულარობის ამბავი მაინც გეცოდინებათ.

თუმცა, სულ ახლახან, კრისტოფერ ნოლანის ოპენჰაიმერის სცენარმა ჯადოსნური ცხოველებიც და თვით კვენტინ ტარანტინოც კი გვერდზე ჩააჩოჩა და Amazon-ზე #1 ბესტსელერი გახდა. ეპიკური ფილმის სცენარი, რომელიც პულიცერის პრემიის მფლობელ წიგნს ეფუძნება, თავად ნოლანს ეკუთვნის. აი, ფილმმა კი, სადაც მთავარ როლს კილიან მერფი ასრულებს, წინა თვეში ნამდვილი ფურორი მოახდინა — ოპენჰაიმერმა ამ დრომდე, სულ რაღაც სამ კვირაში, $560 მილიონზე მეტი გამოიმუშავა.

ასე რომ, გასაკვირი არაა, რატომ გახდა ამ ფილმის სცენარი უპირობო ლიდერი ბესტსელერების ჩამონათვალში.

ოპენჰაიმერის სცენარის გარეკანი.

ფოტო: Faber & Faber

როგორც ვთქვით, ნოლანის ფილმი ბიოგრაფიულ წიგნს ეფუძნება. კაი ბერდისა და მარტინ ჯ. შერვინის არამხატვრული ნაწარმოები, American Prometheus: The Triumph and Tragedy of J. Robert Oppenheimer, ატომური ბომბის შემქმნელი ჯ. რობერტ ოპენჰაიმერის ცხოვრებაზე გვიყვება.

აღსანიშნავია, რომ სცენარს წამძღვარებული აქვს კაი ბერდის შესავალი, სადაც იგი ნოლანს აქებს და ამბობს, რომ რეჟისორმა "უკიდურესად კომპლექსური ბიოგრაფია სასწაულებრივად აქცია ვიზუალურ ხელოვნებად", რომელიც ისტორიული ფიგურის ამბავს ზედმიწევნით მიჰყვება.

ოპენჰაიმერი ნოლანისთვის მე-12 ფილმი და პირველი ბიოგრაფიული ნამუშევარია. კილიან მერფის გარდა, კინოსურათში მთავარ როლებს მეთ დეიმონი, ემილი ბლანტი, რობერტ დაუნი უმცროსი და რამი მალეკი ასრულებენ.

ასევე იხილეთ: