რას ჰყვებიან დაკავებულები: პარტია დროს აჭარის ორგანიზაციის ხელმძღვანელი, გენრი დოლიძე იხსენებს, რომ ის მას შემდეგ დააკავეს, რაც აფხაზეთიდან დევნილსა და ომის ვეტერანს გამოესარჩლა.

• მისი თქმით, მაშინ, როცა რამდენიმე პოლიციელი ვეტერანის დაკავებას ცდილობდა, მოუწოდა მათ, რომ ეს არ გაეკეთებინათ.
• "ხალხი ამაზე აღელდა, ხალხმა ის გამოგლიჯა გდდ-ს და შევრჩი მე ხელში. დამიჭირეს და გინება-გინებით შემათრიეს კორდონის შიგნით, დამადეს ხელბორკილები, დამაწვინეს ქვაფენილზე, შემდგნენ ფეხებით, დამაწყვეს თავზე ფეხი", — ამბობს ის ფორმულასთან.
• დოლიძის თქმით, ამ დროს მასთან ერთი ადამიანი მივიდა, თუმცა ვერ ხედავდა მის სახეს, რადგან "თავზე გდდ-ს წარმომადგენლის ფეხი ედო".
• "როდესაც თავი ამიწიეს, დარწმუნდა ჩემს ვინაობაში, ეს იყო ირაკლი დგებუაძე, მან დედა შემაგინა და თვალის არეში მომიქნია წიხლი, მომარტყა, რაც დაადასტურა იზოლატორის ექიმმაც და მალე ექსპერტიზაზე გადამიყვანს გამომძიებელი, რომელიც იძიებს ჩემს მიმართ შესაძლო ძალადობის საქმეს", — თქვა დოლიძემ.

კიდევ ერთი აქტივისტი, ილია ანთაძე ამბობს, რომ მისმა ქმედებამ პოლიციის ყურადღება მაშინ მიიქცია, როცა 80 წლის კაცს გამოესარჩლა — მისი თქმით, კაცს 8-დან 10-მდე პოლიციელი უსწორდებოდა.

• "მოვუწოდე მათ, რომ ასეთი ხნიერი ადამიანისთვის მსგავსი ქმედება არ გაეკეთებინათ, თუმცა ამ დროს უკნიდან მომეპარა პოლიციელი, რომელმაც პოლიციელებში შემაგდო და მოხდა ჩემი დაკავება. და დღეს გამოცხადებული პოლიციელი სასამართლოზე, მინდა, გითხრათ, რომ გუშინ საერთოდ არ მქონდა ნანახი, რომელმაც თითქოს ჩემი დაკავების ოქმი ჩაიბარა", — ამბობს ის ფორმულასთან.
• პოლიციელთა ქმედებებზე საუბრობს აქციაზე დაკავებული უკრაინის მოქალაქე. ჰყვება, რომ ერთ-ერთი სამართალდამცავი უკიდურესად აგრესიული იყო, შემდეგ კი ისეთ ადგილას წაიყვანეს, სადაც მარტო პოლიციელები იყვნენ.
• "იქ უკვე ძალიან უხეშად მეპყრობოდნენ. არსებობს ვიდეო დაკავების და იქ ყველაფერი თითქოს ნორმალურად ჩანს, მაგრამ მანამდე, ვიდრე ვიდეოს არავინ იღებდა და სანამ მანქანაში ჩამსვამდნენ, ძალის გადამეტება იყო".
• უკრაინის მოქალაქის თქმით, წაართვეს უკრაინის დროშა, რომელიც შემოხვეული ჰქონდა.
• "შოკში ჩავვარდი, როდესაც მხსნიდნენ დროშას და ხელი ჩავჭიდე. ამ დროს ხელები ამომიტრიალეს, თითებს მამტვრევდნენ, რამდენჯერმე დარტყმაც ვიგრძენი. სილურჯეები ახლაც მაქვს".

ბათუმში აქცია 31 ივლისს რუსი პროპაგანდისტებითა და ომის მხარდამჭერებით დატვირთული გემის ნავსადგურში შემოსვლას მოჰყვა.

• პოლიციამ 23 პირი დააკავა — ადგილზე ჩანდა, რომ პოლიციელები პროტესტის მონაწილეებს ძალის გამოყენებით აკავებდნენ, ხოლო რუს მგზავრებს, როგორც პორტის ტერიტორიაზე, ასევე, გემს შიგნითაც, გამალებით იცავდნენ.
• არასამთავრობო ორგანიზაციები შსს-ს მოუწოდებდნენ, კონსტიტუციის ფარგლებში ემოქმედათ.
• სპეციალურმა საგამოძიებო სამსახურმა გუშინ, პირველ აგვისტოს პოლიციელების მხრიდან შესაძლო ძალის გადამეტების საქმეზე გამოძიება დაიწყო.

• საგამოძიებოს განცხადებით, ამას საფუძვლად სახალხო დამცველის აპარატიდან და შსს-ს დროებითი მოთავსების იზოლატორიდან შემოსული შეტყობინებები დაედო.