კობახიძე ისევ ქსენოფობიურ მოტივებზე საუბრობს და ამას უკავშირებს რუსული გემის ბათუმის პორტში ჩამოდგომის შემდეგ მოქალაქეთა პროტესტს.

  • მისი მტკიცებით, ქვეყანას ეკონომიკური წინსვლა აქვს და სწორედ ამის გამო "უკიდურესად შფოთავენ საქართველოს არაკეთილმოსურნეები — კოლექტიური ნაცმოძრაობა და მისი უცხოელი პატრონები".
  • ამბობს, რომ მათი მიზანი ტურისტული ნაკადების ხელოვნური შემცირებაა.
  • ასევე, ამტკიცებს, რომ გუშინდელი აქცია ანტისახელმწიფოებრივი მიზნებითა და გარე დავალებებით არის ნაკარნახევი.

გარდა ამისა, კობახიძე ცდილობს, Astoria Grande-ს მგზავრების დაცვას და საუბრობს იმაზე, რომ იქ რუსი ტურისტების გარდა, სხვა ქვეყნიდანაც იყვნენ.

  • ასევე, ამბობს, რომ გემი არ შესულა აფხაზეთში და იმ მყოფ პირებს ოკუპაციის შესახებ კანონი არ დაურღვევიათ.
  • "ტურისტების საქართველოში ჩამოვიდნენ ერთი დღით ქალაქ ბათუმის მოსანახულებლად. ვერავინ ახსნის საქართველოში რა განსხვავებაა მანქანით და გემით შემოსულ რუს ტურისტებს შორის და შესაბამისად, როგორი ახსნა ჰქონდა კოლექტიური ნაცმოძრაობის მიერ გუშინდელი აქციის მოწყობას", — ამბობს ის.
  • ამის შემდეგ მმართველი პარტიის თავმჯდომარე იმაზე აპელირებს, თუ რა ფინანსური სარგებელი აქვს ქვეყანას საქართველოში შემოსული თითოეული კრუიზიდან.

მადლობას უხდის პოლიციელებს სათანადო რეაგირებისთვის. ეს მაშინ, როცა გუშინ ქართულმა პოლიციამ აქციის 23 მონაწილე დააკავა, ხოლო გემის რუს მგზავრებს როგორც კრუიზს გარეთ, ასევე, მის შიგნითაც იცავდა.

  • გარდა ამისა, არაერთი მოქალაქე საუბრობდა სამართალდამცავთა მიერ ძალის გადამეტებასა და უკანონო დაკავებაზე, ხოლო არასამთავრობო ორგანიზაციები შსს-ს კონსტიტუციის ფარგლებში მოქმედებისკენ მოუწოდებდნენ.
  • "პროვოკაციის სიმძიმისა და შეურაცხყოფის არაერთი შემთხვევის მიუხედავად, პოლიციელებმა იმოქმედეს ადამიანის უფლებების უმაღლესი სტანდარტების შესაბამისად, რათა დაეცვათ საზოგადოებრივი წესრიგი და სახელმწიფოს ინტერესები", — ამტკიცებს ის.

აკრიტიკებს დეგნანს და აშშ-ის ელჩის კომენტარს რუსულ გემზე გაუგებარს უწოდებს.

  • საუბარია განცხადებაზე, სადაც ელჩმა აღნიშნა, რომ ქართველებისგან არავინ უნდა ელოდოს, მიესალმონ ხალხს იმ ქვეყნიდან, რომელიც საქართველოს ტერიტორიების 20%-ის ოკუპაციას ახდენს.
  • "ასე არავინ ფიქრობს, რაც თქვა კელი დეგნანმა, ასე არ ფიქრობენ საქართველოში საზოგადოების წარმომადგნელები, რომ არც ერთი რუსი არ უნდა შემოვიდეს საქართველოში, საზოგადოების უდიდესი უმრავლესობა არის სხვა აზრზე".

რა მოხდა: გუშინ, 31 ივლისს მოქალაქეები პროტესტით შეხვდნენ ბათუმში რუსი პროპაგანდისტებითა და ომის მხარდამჭერებით დატვირთული გემის შემოსვლას.

  • პროტესტის შემდეგ კრუიზის ვებგვერდიდან ბათუმის მიმართულება ამოიღეს.