მოკლული მასწავლებლის, გიგა ავალიანის დედა ეკა კუპატაძე 6 წლის წინ გარდაცვლილი 23 წლის პროგრამისტის, თამარ ბაჩალიაშვილების ოჯახის მხარდასაჭერად პროკურატურაში მივიდა, სადაც ოჯახის წევრები მათ შვილის საქმეზე გამოძიების ხელახლა დაწყებას ითხოვენ.

ეკა კუპატაძე ამბობს, რომ "გიგა ავალიანის დაოსებული დედა იქნება მათ გვერდით" და საზოგადოებას მოუწოდა, რომ თამარ ბაჩალიაშვილის ოჯახს გვერდით დაუდგნენ. "ბევრი შეუძლია ხალხის ძალას" — ამბობს ეკა კუპატაძე.

"სულ რამდენიმე წუთის წინ გავეგე, რომ თამარ ბაჩალიაშვილის მშობლებს ჩემგან მხარდაჭერა სჭირდებოდათ და, რა თქმა უნდა, უყოყმანოდ მოვაშურე მათ. მე მინდა იცოდნენ, რომ გიგა ავალიანის დაოსებული დედა იქნება მათ გვერდით. აი, ერთი ადამიანი რომ ჭირდებოდეთ, ის ერთი ადამიანი მე ვიქნები მათ გვერდით.

საზოგადოების თანადგომას ძალიან, ძალიან დიდი მნიშვნელობა აქვს. ბევრი შეუძლია ხალხის ძალას და ყველა უნდა გამოძებნოს დრო, თუკი ამ ხალხს ჩვენი გვერდით დადგომა ჭირდება, უნდა დავუდგეთ. ჩვენ არ დაგვიზრდია კარგი გიგა, თამარი, კარგი ნიკო და ასე შემდეგ, არ ჩამოვთვლი ბავშვებს, არ მინდა რომელიმე გამოგრჩეს, იმისთვის, რომ მერე სადისტებმა მიწის ქვეშ ამოგვიფინოს.

აუცილებლად უნდა იყოს იდენტიფიცირებული ყველა სავარაუდო დამნაშავე და ყველა უნდა დაჯდეს საბრალდებო სკამზე. ახლა მე გავესაუბრე თამარის მშობლებს და მითხრეს, რომ თვითმკვლელობით დაიხურა საქმე.

თვითმკვლელობამდე მიყვანა ხომ დასჯადია? ვინ და რამ აიძულა ეს ტვინით გამოტენილი და მომავლის იმედით მცხოვრები გოგონა თვითმკვლელობამდე რომ მისულიყო? თუკი მართლა ასე მოხდა, რა ჯოჯოხეთი ჰქონდა მას სიცოცხლის ბოლო დღეებში, ბოლო წუთებში?", — ამბობს ეკა კუპატაძე და იმედს გამოთქვამს, რომ მისი შვილის მკვლელობის საქმის გამოძიების მსგავსად პროკურატურა თამარ ბაჩალიაშვილის საქმესაც ბოლომდე მიიყვანს და დამნაშავეები დაისჯებიან.

"მე ასე მგონია მაინც, რომ გულმოდგინედ თუ ჩაუჯდება პროკურატურა თამარ ბაჩალიაშვილის საქმეს, ვფიქრობ, რომ არაფერი არ დარჩება გამოუძიებელი.

მე ამას ვამბობ არა ზედაპირულად, არამედ ღრმად საქმეში ჩახედულად. მე ვიცი საიდან რა ამოქექა პროკურატურამ და როგორ გამოიძიეს გიგა ავალიანის მკვლელობის საქმე — სრულყოფილად, მართლა საფუძვლიანად და სრულყოფილად. დარწმუნებული ვარ, ასე დაუდგებიან გვერდით თამარის მშობლებსაც და მაქსიმუმს გააკეთებენ აქაც", — განაცხადა ეკა კუპატაძემ.

დღეს თამარ ბაჩალიაშვილის ოჯახის წევრები პროკურატურაში მივიდნენ და განცხადება შეიტანეს მათი შვილის საქმეზე ხელახლა გამოძიების დაწყების მოთხოვნით.

"შევიტანე განცხადება, რომ თავიდან დაიწყოს გამოძიება, იმიტომ, რომ თავიდანვე არასწორად იყო წარმართული. გამოძიება კი არ იყო, უბრალოდ იყო ჩაფარცხვა. რაც კი რამე არგუმენტები და ფაქტები იყო, ყველაფერი ჩაფარცხეს და გაანეიტრალეს. […] თუ არ გამოიძიებენ, ეს უკვე პირდაპირი მინიშნება იქნება იმისა, რომ თვითონ არიან ყველაფრის გამყალბებლებიც და ჩამდენებიც", – ამბობს გარდაცვლილი პროგრამისტის დედა თეონა თამაზაშვილი და ამატებს, რომ მისი შვილის სიკვდილის მიზეზი "კომპრომატები" იყო.

"კეთილი ინებონ და გამოიძიონ, რომ თამუნას თავი არ მოუკლავს და ის მოკლეს უშუალოდ მაღალჩინოსნებმა. კომპრომატების გამო არ არის დღეს ჩემი შვილი ჩემთან.

გრიგოლ ლილუაშვილს პირდაპირი კავშირი აქვს, იმიტომ, რომ მაგას რომ ვადებდით ხელს და ჯერ კიდევ არ იყო მაგის ბრალეულობა გამოკვეთილი, "მე არ მომიკლავს თამარ ბაჩალიაშვილიო". იმაზე გააკეთა მინიშნება, რომ ჩემი დაკვეთით არ მომხდარა და სხვისი დაკვეთით მოხდაო. ეს შეიძლება იყოს ერთ-ერთი ქოლცენტრი, რომელსაც გრიგოლ ლილუაშვილი მფარველობდა. ღარიბაშვილის ის (ბრალია) რომ მისი ნათესავის ვილაში მოხდა მკვლელობა", – ამბობს თამარ ბაჩალიაშვილის დედა.