DRI-ის ცნობით, ბათუმში დაკავებებს პირადად ხელმძღვანელობს შსს-ს აჭარის ა/რ პოლიციის დეპარტამენტის დირექტორი, გრიგოლ ბესელია, რომელსაც სოციალურ ქსელში გავრცელებული ფოტოს მეშვეობით, პირადად ადანაშაულებენ ძალადობაში.

• აქციაზე მყოფი ერთ-ერთი მოქალაქე აცხადებს, რომ მან პროტესტის მონაწილე გოგოს სახეში გაარტყა.
• ორგანიზაციაში ამბობენ, რომ ბესელიას წარსულში მოქალაქეები იარაღის ჩადებაშიც ადანაშაულებდნენ.
• გარდა ამისა, DRI-ის განცხადებით, აქტივისტების დაკავებაში პირადად მონაწილეობს შსს-ს საპატრულო პოლიციის დეპარტამენტის აჭარის მთავარი სამმართველოს უფროსი, დავით მაღრაძე.
• "დავით მაღრაძე და გროგოლ ბესელია წარსულში არაერთხელ გამოირჩეოდნენ ანტირუსული აქციების დროს სავარაუდო დაკავებების ორგანიზებასა და პირადად განხორციელებაში".

დეტალები: ორგანიზაცია განმარტავს, რომ კონსტიტუციით, შეკრების უფლების განხორციელებისას, როგორც ჭერქვეშ, ისე გარეთ, შეკრება წინასწარი ნებართვის გარეშეა შესაძლებელი.

• ასევე, მიუთითებენ, რომ ადმინისტრაციულ სამართალდარღვევათა კოდექსის 245-ე მუხლის მიხედვით, დამკავებელი სამართალდამცავი ვალდებულია, დაკავებულს დაკავებისთანავე მისთვის გასაგები ფორმით განუმარტოს:
• ჩადენილი ადმინისტრაციული სამართალდარღვევა და დაკავების საფუძველი, უფლება ადვოკატზე, სურვილის შემთხვევაში მისი დაკავების ფაქტი და ადგილსამყოფელი ეცნობოს მის მიერ დასახელებულ ახლობელს.

საგანგაშოს უწოდებენ მშვიდობიანი შეკრების მონაწილეების დაკავებისას სამართალდამცავების მიერ კანონმდებლობით დადგენილი ვალდებულების შეუსრულებლობას.

• ასევე, მათი მხრიდან გამოყენებული დაუსაბუთებელი, უკანონო და არაპროპრციულ ძალადობას.
• "DRI მიიჩნევს, რომ პოლიტიზებული და რეპრესიული უკანონო დაკავებები სახელმწიფოს კონსტიტუციურ წეს-წყობილებას საფუძველს აცლის".
• მოუწოდებენ შსს-ს, იმოქმედოს კონსტიტუციის ფარგლებში, შეწყვიტოს საპოლიციო ძალადობის პოლიტიკური რეპრესიების ინსტრუმენტად გამოყენება და პატივი სცეს შეკრებისა და გამოხატვის თავისუფლებას.
• ასევე, მიმართავს სპეციალურ საგამოძიებოს, დაუყოვნებლივ დაიწყოს გამოძიება სამართალდამცავების მხრიდან ჩადენილი სავარაუდო ძალადობის ფაქტებზე.

რა მოხდა: დღეს ბათუმში აქციაზე, სადაც რუსი პროპაგანდისტებით დატვირთული გემის ჩამოდგომას აპროტესტებდნენ, რამდენიმე ადამიანი დააკავეს.

• აქციაზე ათეულობით სამართალდამცავი იმყოფებოდა და რუსებს, როგორც გემს გარეთ, ასევე, გემს შიგნითაც იცავდნენ.
• მაგალითად, ჩვენს კადრებში ჩანს, რომ რუსულ გემზე რამდენიმე ქართველი პოლიციელი იყო ასული.
• შემდეგ კი ოკუპანტი ქვეყნიდან ჩამოსულებისთვის კორიდორი გააკეთეს, წინასწარ მომზადებულ ავტობუსსა და მიკროავტობუსში ააცილეს და ასე გაარიდეს ტერიტორიას.
• "ნაგავი ვესროლე რუსების მანქანას", — ასე პასუხობს აქციის ერთ-ერთი მონაწილე კითხვას, რატომ დააკავეს.
• ლელოს წევრმა, ირაკლი კუპრაძემ ფეისბუქგვერდზე ვიდეოს გაავრცელა და დაწერა, რომ ასევე, დააკავეს უკრაინის მოქალაქე, რომელსაც წაართვეს ტელეფონი, პირადი ნივთები და არ აძლევდნენ დარეკვის შესაძლებლობას.