ბახმაროს დოღზე მხედარმა ცხენი ვერ დაიმორჩილა, ხალხში შევარდა და 5 წლის გოგოს დაეჯახა. ბავშვი ჩოხატაურის ერთ-ერთ კლინიკაშია გადაყვანილი. ინფორმაციას "გურია ნიუსი" ავრცელებს.

"გურია ნიუსი" ინციდენტის თვითმხილველი მოქალაქის მიერ სოციალურ ქსელში გამოქვეყნებულ კომენტარსაც ავრცელებს, სადაც ნათქვამია, რომ მომხდარის მიუხედავად დოღი არ შეჩერებულა, დაშავებული ბავშვი კი ჩოხატაურის კლინიკაში გადაიყვანეს.

"2026 წლის ბახმაროს დოღი.

მხედარმა ცხენი ვერ დაიმორჩილა, ხალხში შევარდა და 5 წლის გოგონას დაეჯახა. თავი დაუზიანა. ჩოჩქოლმა წამყვანიც შეაშფოთა, მაგრამ გააგრძელეო, უთხრეს და დოღიც გაგრძელდა.

სასწრაფო ჩვენს წინ იდგა, თვალს ვადევნებდით, შემთხვევა ფინიშიდან პარკისკენ 300 მეტრში მოხდა, ჩვენ ვერ ვხედავდით რეალურად რა მოხდა.

ვფიქრობდი, სასწრაფო რატომ არ გამოიძახეს-მეთქი და ამ დროს ვიღაც კაცი მორბოდა სასწრაფოსკენ, თურმე მამა იყო, ექიმები მაშინვე ფეხით წავიდნენ, დოღი გრძელდებოდა, უცებ დავინახე გზიდან კი არა, მინდორ-მინდორ მოჰყავდა მამას ხელში აყვანილი ერთი ციცქნა გოგონა, რადგან გზაზე დოღი იყო, თმა სულ სველი ჰქონდა, იმდენი წყალი ასხეს, ეტყობა. ექიმები უკან მოსდევდნენ, დააწვინეს მანქანაში და მანამ იყო, სანამ დოღი არ დამთავრდა.

დოღი დამთავრდა, დაიძრა, ერთხანს წყალზე იყო გაჩერებული, მერე გიჟივით გავარდა, ცენტრალურ გზაზე მანქანების ესკორტმა შეუშალა ხელი, არც სირენა და არც პოლიციელების ხმები. ერთხანს იქ იყო გაჩერებული, რადგან მანქანები არ აძლევდა თავისუფლად წასვლის საშუალებას.

პოლიციაც უძრავად იყო, ვითომ არაფერი სიმღერები გაგრძელდა და გრძელდება.
იცით?

ბობოლების შვილი რომ ყოფილიყო, ატყდებოდა მაგრამ, რა ატყდებოდა, მაგრამ ის ხომ თქვენი შვილი არ იყო.

აი, ეს ხართ, თქვენ, ქართველების ერთი კატეგორია.

ღმერთო, რა უნდა გითხრა, ღმერთო, კარგად ამყოფე პატარა გოგონა, გევედრები, ღმერთო.

[…]

მეგობრებო, ის სასწრაფოს მანქანა დაბრუნდა და ბავშვი ქუთაისში გადავაგზავნეთო, კარგადაა",— დაწერა სოციალურ ქსელში მაკა კუტუბიძე.

შსს-ს ცნობით, გამოძიება სისხლის სამართლის კოდექსის 124-ე მუხლით დაიწყო, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს. დანაშაული ისჯება ჯარიმით ან გამასწორებელი სამუშაოთი ვადით ორ წლამდე.