თუკი უკვე დიდი ხანია, რაც საკუთარი ავტომობილი გყავს, უთუოდ გეცოდინება, რამხელა პასუხისმგებლობაა ეს. პასუხისმგებელი ხარ, პირველ რიგში, საკუთარ თავთან, რომ სრულად გამართული ავტომობილი მართო და უსაფრთხოდ იმგზავრო, ასევე — სხვა ავტომობილების მფლობელებთან, რომლებიც გზებზე შენთან ერთად გადაადგილდებიან.

თუმცა, თუ სულ ეს-ესაა, რაც შენი პირველი მანქანა შეიძინე და კეთილისმსურველების რჩევებს აგროვებ, შენ გვერდით გვიგულე. ამჯერად, გირჩევთ, რა უნდა გქონდეს ავტომობილში აუცილებლად. მნიშვნელობა არ აქვს, ახლომახლო მიდიხარ სადმე თუ ქალაქგარეთ აპირებ გამგზავრებას — როცა სახლიდან მანქანით ხარ გასული, ავტომობილი შენს დროებით საბინადროდ იქცევა და საჭიროა, მასში ისევე კომფორტულად და უსაფრთხოდ იგრძნო თავი, როგორც შინ.

1. პირველადი დახმარების ნაკრები

რამდენად გამართულიც უნდა იყოს ავტომობილი, გაუთვალისწინებელი შემთხვევებისგან დაზღვეული არავინ ვართ. ამდენად, საჭიროა, მანქანაში მის შესაკეთებლად საჭირო საბაზისო ნივთები გეგულებოდეს.

პირველ რიგში, აუცილებლად უნდა გქონდეს თან საბურავის დასაბერი, სათადარიგო საბურავი, ამწე (იგივე დომკრატი) და ქანჩი. კარგი იქნება, წინასწარ პატარა მომზადებასაც თუ გაივლი გამოცდილ ადამიანთან და ისწავლი, როგორ გამოცვალო საბურავი საჭიროების შემთხვევაში. მერე კი სათანადო ხელთათმანების შეძენასაც ნუ დაივიწყებ.

ასევე არ დაგავიწყდეს, ავტომობილის საბარგულში ჩადო ბუქსირის თოკი, დასაქოქი კაბელი, დამატებითი ბატარეა და საავარიო შუქამრეკლი სამკუთხედი. რასაკვირველია, ყოველი შემთხვევისთვის, თან უნდა გქონდეს ცეცხლმაქრიც.

2. პირველადი სამედიცინო დახმარების ყუთი

ისევე როგორც მანქანას, პირველადი და გადაუდებელი დახმარება, შესაძლოა, ადამიანსაც დასჭირდეს. თუმცა, ავტომობილისგან განსხვავებით, ამ შემთხვევაში წუთები ან წამებიც კი გადამწყვეტი შეიძლება აღმოჩნდეს, აფთიაქი კი ახლომახლო არ იყოს. ასე რომ, ყოველი მგზავრობის წინ დარწმუნდი, რომ მანქანაში სრულად აღჭურვილი სამედიცინო დახმარების ყუთი გეგულება.

სასურველია, გაიარო გადაუდებელი სამედიცინო დახმარების კურსიც, სადაც თეორიული და პრაქტიკული მეცადინეობებით გასწავლიან, როგორ აღმოუჩინო ადამიანს საჭირო დახმარება სასწრაფოს მოსვლამდე.

3. საბუთები

ალბათ გაგეცინა, მაგრამ საქმე საქმეზე რომ მიდგება, შეიძლება აღმოაჩინო, რომ საჭირო საბუთი თან არ გაქვს. საბუთი კი მრავალგვარია და ბევრი სხვადასხვა მიზეზითაც შეიძლება დაგჭირდეს — მაინც რა უნდა იქონიო თან?

პირველ რიგში, პირადობის დამადასტურებელი მოწმობა; მასთან ერთად კი, მართვის მოწმობა, ავტომობილის სარეგისტრაციო საბუთი (ტექპასპორტი) და მანქანის დაზღვევის პოლისი. დარწმუნდი იმაშიც, რომ ავტომობილის სავალდებულო ტექდათვალიერების ვადას არ გადააცილე.

4. საწმენდი საშუალებები

დასაწყისშივე ვთქვით, სახლიდან მანქანით გასულისთვის ავტომობილი დროებითი ბინააო. ჰოდა, როგორც ნამდვილ ბინას სჭირდება წესრიგში ყოფნა, ზუსტად ასევეა აუცილებელი, ავტომობილის სალონში სისუფთავე იყოს. ამისათვის, პირველ რიგში, უნდა გქონდეს შესაბამისი სათავსოები, რომ ყველაფერი თავის ადგილას დააბინაო. თუმცა, ვაითუ გაუთვალისწინებელი შემთხვევა მოხდეს, სველი ხელსახოცები, სუფთა ჩვარი და წყლის სავსე ბოთლიც აუცილებლად იქონიე თან.

5. სასმელი წყალი, სამოსი და სხვა დანარჩენი

მანქანით მგზავრობისას მხოლოდ მის სისუფთავესა და უსაფრთხოებაზე როდი უნდა ვიფიქროთ — საჭიროა, ჩვენი ყველა საჭიროებაც მივიღოთ მხედველობაში და მოსალოდნელი რისკებიც გავთვალოთ.

ნებისმიერი შემთხვევისთვის, აუცილებელია, თან გვქონდეს სასმელი წყალი — რაოდენობა დამოკიდებულია მგზავრობის ხანგრძლივობასა და მარშრუტზე.

შორს გამგზავრებამდე ასევე გაითვალისწინე, რომ შენი ტელეფონის ბატარეა ბოლომდე დამუხტული იყოს (სასურველია, წაიყოლო "ფაუერ ბენქიც") და წვდომა გქონდეს მობილურ ინტერნეტზე ან სატელეფონო კავშირზე. ცხადია, გააჩნია, სად და წლის რომელ სეზონზე მიდიხარ, მაგრამ მანქანაში ერთი პლედი ან ღუნღულა თბილი სამოსიც არასდროსაა ზედმეტი.

ამ ყველაფრის მიუხედავად — რაც უნდა გათვლილი გქონდეს მგზავრობის ყოველი რისკი — გზადაგზა უსიამოვნო მოულოდნელობებს მაინც შეიძლება გადააწყდე. სწორედ ამისთვის არსებობს ავტომომსახურების ქართული სერვისი ვუვლი, რომელიც საშუალებას გაძლევს, საჭიროების შემთხვევაში ავტოექსპერტი დისტანციურად გამოიძახო და მანქანის შეკეთებაზე ზრუნვაც მას გადააბარო. ეს ციფრული პლატფორმა შენი მანქანის ყველა საჭიროებას ერთ სივრცეში უყრის თავს და სწრაფ, ხარისხიან და სანდო მომსახურებას გთავაზობს.