კოლორადოელი ოჯახი, რომელსაც ცივილიზაციისგან შორს სურდა ცხოვრება, ცოტა ხნის წინ ტყეში გარდაცვლილი იპოვეს. როგორც ოჯახის სხვა წევრები ამბობენ, ორი და და ერთ-ერთის 14 წლის შვილი წინა ზაფხულიდან მოყოლებული ტყეში ცხოვრობდნენ და სამყაროსთან კავშირი გაწყვიტეს. გასულ კვირას კი პოლიციამ მათი ცხედრები იპოვა.

გარდაცვლილი ქალების და ამბობს, რომ მათი შეჩერება სცადა, თუმცა არ გამოუვიდა. როგორც გაირკვა, დებს აქამდე ტყეში არასდროს უცხოვრიათ და ველურ გარემოში გადარჩენის გამოცდილება არ ჰქონდათ. ცივილიზაციისგან შორს ცხოვრების შესახებ ისინი ინტერნეტში ვიდეოებს უყურებდნენ და სტატიებს კითხულობდნენ, მოგვიანებით კი გადაწყვიტეს, ბედი თავად ეცადათ.

გარდაცვლილთაგან ერთ-ერთის ცხედარი კარავთან ახლოს იპოვეს, დანარჩენები კი კარავში იყვნენ. ოჯახის გარდაცვალების მიზეზი ჯერჯერობით უცნობია, თუმცა ექიმები ვარაუდობენ, რომ სიკვდილი შესაძლოა შიმშილს, ყინვას ან ნახშირბადის მონოოქსიდით მოწამვლას გამოეწვია.

როგორც ადგილობრივები აღნიშნავენ, გასული ზამთარი კოლორადოს შტატში ძალიან ცივი იყო, თოვა კი იმაზე დიდხანს გაგრძელდა, ვიდრე ელოდნენ. გარდაცვლილი ოჯახი ტყეში გასულ ზაფხულს დაბანაკდა, ექსპერტები კი ვარაუდობენ, რომ ისინი ზამთარში გარდაიცვალნენ.