ირანელმა მოჭადრაკე სარა ხადემმა იანვარში ყაზახეთის ქალაქ ალმატიში საერთაშორისო ტურნირზე ჰიჯაბის გარეშე იასპარეზა. სარას წინააღმდეგ ირანში დაპატიმრების ორდერი მაშინვე გამოსცეს, რადგან კანონის მიხედვით, მოჭადრაკეს ჰიჯაბის გარეშე სხვა ქვეყანაში ასპარეზობა ეკრძალებოდა.

მოჭადრაკემ მაშინვე განაცხადა, რომ ქმარ-შვილთან ერთად საცხოვრებლად ესპანეთში გადადიოდა. ახლახან გავრცელებული ინფორმაციით კი, სარამ ესპანეთის მოქალაქეობა მიიღო.

Reuters-თან ინტერვიუში სარამ განაცხადა, რომ არ ნანობს ამ ჟესტს, რითაც ირანში მიმდინარე საპროტესტო მოძრაობას მხარი დაუჭირა. ესპანეთის მინისტრთა კაბინეტმა კი სარა ხადემს მოქალაქეობა გასულ სამშაბათს დაუმტკიცა. როგორც მთავრობის განცხადებაშია ნათქვამი, სარას საქმის მიმართ განსაკუთრებული გარემოებები გაითვალისწინეს.

ფოტო: Getty Images

შეგახსენებთ, რომ 22 წლის ირანელი ქალის, მაჰსა ამინის გარდაცვალებას ქვეყანაში, შემდეგ კი მსოფლიოში საპროტესტო აქციები მოჰყვა. მაჰსა ამინი ე.წ. მორალის პოლიციამ "ჰიჯაბის ტარების წესის დარღვევისთვის" 13 სექტემბერს დააპატიმრა. თვითმხილველების თქმით, პოლიციის მანქანაში ჩასმის შემდეგ მაჰსას ფიზიკურად გაუსწორდნენ, მოგვიანებით კი ქალი გარდაიცვალა.

სარა ხადემი იმ ირანელ სპორტსმენთაგან ერთ-ერთია, რომელიც ქვეყანაში მიმდინარე საპროტესტო გამოსვლებისადმი სოლიდარობის ნიშნად საერთაშორისო ტურნირზე ჰიჯაბის გარეშე გამოჩნდა.

ირანში ჰიჯაბის ტარება ყველა ქალისთვის სავალდებულო 1983 წლის აპრილში გახდა.