22 წლის ირანელი ქალი, მაჰსა ამინი, ე.წ. მორალის პოლიციამ "ჰიჯაბის ტარების წესის დარღვევისთვის" 13 სექტემბერს დააპატიმრა. ამინი ოჯახთან ერთად თეირანში ნათესავების მოსანახულებლად მიემგზავრებოდა. პოლიციამ ის მანქანაში ძალით ჩასვა, მის ძმას, რომელმაც მათი შეჩერება სცადა, კი უთხრეს, რომ მაჰსას ჩაცმულობის შესახებ "ერთსაათიან გაკვეთილს" ჩაუტარებდნენ, შემდეგ კი გაათავისუფლებდნენ.

მაჰსას ძმა მას პოლიციის განყოფილების წინ ელოდებოდა, როცა შენობასთან სასწრაფოს მანქანა მოვიდა. ოჯახს უთხრეს, რომ მაჰსას გულის შეტევა დაემართა და კომაში ჩავარდა. მაჰსა 16 სექტემბერს გარდაიცვალა.

თვითმხილველების თქმით, პოლიციის მანქანაში ჩასმის შემდეგ მაჰსას ფიზიკურად გაუსწორდნენ. ბრალდება პოლიციამ უარყო. მაჰსას ოჯახის წევრების თქმით, მას დაკავებამდე ჯანმრთელობის პრობლემები არ ჰქონია.

მაჰსას სიკვდილმა პროტესტის ტალღა გამოიწვია. თვითმხილველებისა და გავრცელებული ვიდეოების მიხედვით, მის დაკრძალვაზე ზოგიერთმა ქალმა პროტესტის ნიშნად ჰიჯაბი მოიხსნა.

პროტესტის მონაწილეებს პოლიციელებმა ცეცხლი გაუხსნეს. გავრცელებული ინფორმაციით, არიან დაშავებულები, პროტესტის მონაწილეთა ნაწილი კი დააკავეს.