რა მოხდა: 11 ივლისს გავრცელდა ინფორმაცია, რომ წყნეთში 16 წლის მოზარდი დაიღუპა.

  • ადგილობრივები მედიასთან ჰყვებოდნენ, რომ არასრულწლოვანს სკვერში მიმდინარე ინფრასტრუქტურული სამუშაოების ადგილზე დენმა დაარტყა.
  • შსს-მ გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესების დარღვევას გულისხმობს.

თბილისის მერი ამბობს, რომ დასასვენებელ პავილიონში, სადაც უბედური შემთხვევა მოხდა, ელექტროხაზი თვითნებურად იყო დაერთებული.

  • "სრული პასუხისმგებლობით ვაცხადებ, რომ აღნიშნულ დასასვენებელ პავილიონში ელექტროხაზის დაერთებაზე მუნიციპალიტეტის მხრიდან არანაირი ნებართვა გაცემული არ ყოფილა. მისი დაერთება მოხდა თვითნებურად. ასევე, ხაზს ვუსვამ იმ ფაქტს, რომ მერიის მიერ მოწყობილ ფანჩატურებში, გარდა რამდენიმე საქალაქო მნიშვნელობის პარკისა, არ არის დამონტაჟებული ელექტროგაყვანილობები", — თქვა კალაძემ.
  • მისივე განცხადებით, მომხდარის დეტალებს გამოძიება დაადგენს.
  • "პირველადი მონაცემებით, ბავშვის გარდაცვალების მიზეზად სახელდება ფანჩატურში კუსტარულად დამონტაჟებული ელექტრომოწყობილობა. ყველამ უნდა იცოდეს, რომ ნებისმიერი კუსტარული დაერთება არის უკანონობა. არავის აქვს უფლება, შესაბამისი ნებართვისა და სპეციალისტების ჩართულობის გარეშე მსგავსი ტიპის სამუშაო აწარმოოს".

მომხდართან კავშირი უარყო ვაკის რაიონის გამგეობამაც.

  • მათ 11 ივლისს განცხადება გაავრცელეს, სადაც წერდნენ, მცდარია ინფორმაცია, თითქოს მოზარდის დაღუპვა სკვერში მიმდინარე ინფრასტრუქტურულ სამუშაოებს უკავშირდება.
  • მათივე თქმით, უბედური შემთხვევა ფანჩატურში მოხდა, სადაც ელექტრომოწყობილობა კუსტარულად იყო დამონტაჟებული.
  • "ეს არის სრული სიცრუე და თბილისის მუნიციპალიტეტის დისკრედიტაციის მცდელობა. სკვერის გამწვანების სამუშაოები საწყის ეტაპზეა და ამ დრომდე არანაირი შეხება არ ჰქონია ზემოხსენებულ ფანჩატურთან", — წერენ ისინი.
  • გამგეობაში ამბობენ, რომ მოზარდის გარდაცვალების ზუსტ მიზეზს გამოძიება დაადგენს.
  • "ასევე, დადგინდება ის პირები, რომელთაც უკანონოდ აწარმოეს ეს სამუშაო", — ვკითხულობთ განცხადებაში.