რა მოხდა 5 ივლისს: დღეს ორი წელი გავიდა იმ მასშტაბური ძალადობიდან, რაც თბილისის ქუჩებში ვიხილეთ.

  • რუსთაველის გამზირზე, სადაც ღირსების მარში იყო დაგეგმილი, პრორუსულმა ძალადობრივმა ჯგუფებმა და სასულიერო პირებმა დააორგანიზეს ძალადობა.
  • დაარბიეს აქტივისტების ოფისები, იძალადეს 50-ზე მეტ ჟურნალისტზე — 5 ივლისს ნაცემი ოპერატორი ლექსო ლაშქარავა გარდაიცვალა.
  • ამას წინ ღარიბაშვილის განცხადება უძღოდა იმაზე, რომ ღირსების მარშს მიზანშეწონილად არ მიიჩნევს.
  • მიუხედავად ამ ყველაფრისა, ძალადობის ორგანიზატორები დასჯილნი არ არიან, მეტიც, ისინი წელსაც იმუქრებიან და ძალადობრივ მოწოდებებს აგრძელებენ.
  • 5-6 ივლისის მოვლენების ეფექტიანი გამოძიებისკენ სახელმწიფო უწყებებს მოუწოდა, როგორც ევროპის საბჭოს მინისტრთა კომიტეტმა, ისე ევროპარლამენტმაც.
  • ამასთან, 2022 წლის 9 ივლისის რეზოლუციაში აღნიშნულია, რომ ასეთი ქმედებების ჩამდენთა დაუსჯელობა არ შეიძლება იყოს შეწყნარებული, რადგან ის როგორც ეროვნულ კანონმდებლობას, ისე საერთაშორისო ვალდებულებებს არღვევს.
  • ამ წლის 28 თებერვალს გამოქვეყნებული აშშ-ის სახელმწიფო დეპარტამენტის ანგარიშში ვკითხულობთ, რომ შინაგან საქმეთა სამინისტრომ მთელი დღის განმავლობაში ვერ შეძლო არეულობის კონტროლი.
  • "მიუხედავად 28 მოძალადის დაკავებისა და შემდგომში გასამართლებისა, არც ერთი ჯგუფის ლიდერი ან ძალადობის ორგანიზატორი არ არის პასუხისგებაში მიცემული".

ხელისუფლების გააქტიურებული ჰომოფობია: ძალადობიდან ორი წლის თავზე გაძლიერდა მმართველი გუნდის ჰომოფობიური რიტორიკაც.

  • მეტიც, ისინი ახალისებენ კიდეც იმ ძალადობრივ მოწოდებებს, რომელიც გვესმის, ამის მაგალითი კი კობახიძის დღევანდელი განცხადებაა.
  • მისი მტკიცებით, "სამართლებრივი თვალსაზრისით, 5 ივლისის დანაშაულს ორგანიზატორები არ ჰყავდა".
  • გარდა ამისა, ბოლო პერიოდში ღარიბაშვილმა აქტიურად დაიწყო პროპაგანდისტული თემებით მანიპულირება და მათ გასაჟღერებლად საერთაშორისო ტრიბუნებსაც იყენებს.

დეტალები: საიას განცხადებით, 5-6 ივლისის მოვლენებიდან 2 წლის გასვლის შემდეგაც ამ დრომდე შესაძლო დანაშაულების ყველა ეპიზოდი სათანადოდ არ არის გამოძიებული.

  • აღნიშნავენ, რომ მიუხედავად კონკრეტული მოძალადე პირების დასჯისა, არ დასჯილან ორგანიზატორი, ხელმძღვანელი ან ძალადობრივი ქმედებების საჯაროდ მომწოდებელი პირები.
  • განცხადება გაავრცელა მედიაომბუდსმენმაც და ხელისუფლებას კიდევ ერთხელ შეახსენა პასუხისმგებლობა — სათანადოდ დასაჯოს დანაშაულებრივი ქმედებების ჩამდენი პირები და ორგანიზატორები.
  • მათი თქმით, მათმა დაუსჯელობამ კიდევ უფრო გააუარესა მედიაგარემო საქართველოში.
  • ასევე, ნათქვამია, რომ ხელისუფლება პასუხისმგებელია, მიიღოს სათანადო ზომები 2023 წლის 8 ივლისს დაანონსებული ძლადობის და დანაშაულების შესაჩერებლად.