რატომ არის მნიშვნელოვანი: ქართული ოცნების ინიციატივით, ცენტრალური საარჩევნო კომისიის დაკომპლექტების წესი იცვლება.

  • მმართველ პარტიას სურს, ცესკოს თავმჯდომარეობის კანდიდატებს, პრეზიდენტის ნაცვლად, პარლამენტი წარადგენდეს.
  • საკანონმდებლო ორგანო კანდიდატებს თანამდებობაზე 5 წლის ვადით, სრული შემადგენლობის უმრავლესობით აირჩევს, მაშინ, როცა დღეს ამისთვის დეპუტატების 2/3-ის მხარდაჭერაა საჭირო.
  • ასევე, ცესკოს არაუმეტეს 9 წევრს პარტიები დანიშნავენ.
  • ცესკოს თავმჯდომარისა და წევრების შესარჩევ კონკურსს გამოაცხადებს და საკონკურსო კომისიას შექმნის პარლამენტის თავმჯდომარე.
  • სალომე ზურაბიშვილმა საარჩევნო კოდექსში ცვლილებას ვეტო 26 ივნისს დაადო.
  • პრეზიდენტის განცხადებით, ასეთ თანამდებობებზე ერთპარტიული დანიშვნები სახელმწიფოებრიობასა და ევროპულ მომავალს ეწინააღმდეგება.

დეტალები: ცენტრალური საარჩევნო კომისიის თავმჯდომარისა და წევრების არჩევის წესის ცვლილებაზე პრეზიდენტის ვეტო პარლამენტმა რამდენიმე წუთის წინ დაძლია.

  • ზურაბიშვილის მოტივირებულ შენიშვნებს მხარი 22 დეპუტატმა დაუჭირა, 33 კი წინააღმდეგი იყო.
  • ამის შემდეგ საკანონმდებლო ორგანოში კენჭი უყარეს საარჩევნო კოდექსში შესატან ცვლილებებს, რაც პარლამენტმა 78 ხმით 14-ის წინააღმდეგ დაამტკიცა.
  • კენჭისყრის შემდეგ გირჩის დეპუტატმა, ალექსანდრე რაქვიაშვილმა პარლამენტის თავმჯდომარეს უთხრა, რომ დარბაზში საერთოდ არ იმყოფებოდა უმრავლესობის 78 დეპუტატი და მათი რაოდენობა გადაეთვალა, რაზეც პაპუაშვილმა უპასუხა, რომ თუ დათვლა უნდოდა, თავად დაეთვალა.