პოლონეთის, საფრანგეთის და გერმანიის საგარეო საქმეთა მინისტრები საქართველოში არსებულ პოლიტიკურ ვითარებასთან დაკავშირებით ერთობლივ განცხადებას ავრცელებენ.

აღნიშნულ განცხადებაში, რომელიც პოლონეთის საგარეო საქმეთა სამინისტრომ გაავრცელა, წერია, რომ ვაიმარის სამკუთხედის საგარეო საქმეთა მინისტრები, ეუთო/ოდირის საბოლოო ანგარიშზე დაყრდნობით, 26 ოქტომბრის საპარლამენტო არჩევნებში არსებულ დარღვევებთან და საქართველოში მიმდინარე პოლიტიკურ პროცესებთან დაკავშირებით, შეშფოთებას გამოხატავენ.

ტექსტში ხაზგასმით წერია მათი აღნიშვნა, რომ "არჩევნები არ ჩატარდა იმ სტანდარტების შესაბამისად, რა მოლოდინიც არსებობდა ევროკავშირის კანდიდატი ქვეყნისგან".

ამასთან, ევროკავშირის სამი ქვეყნის საგარეო საქმეთა მინისტრების მიერ გავრცელებულ განცხადებაში ვკითხულობთ, რომ ისინი განიხილავენ ევროკავშირის გადაწყვეტილებას, საქართველოს დიპლომატიური და სამსახურებრივი პასპორტის მფლობელთათვის უვიზო მოგზაურობის შეწყვეტის შესახებ.

"ჩვენ, ვაიმარის სამკუთხედის საგარეო საქმეთა მინისტრები, შეშფოთებას გამოვხატავთ საქართველოში მიმდინარე პოლიტიკური კრიზისის გამო, რომელიც განვითარდა 26 ოქტომბრის საპარლამენტო არჩევნების შემდეგ და ქართული ოცნების გადაწყვეტილებით, ევროკავშირის წევრობის პროცესის გაყინვასთან დაკავშირებით. კრიზისის მიზეზია საქართველოს მმართველი პარტიის პოლიტიკური კურსი და ევროპული გზიდან გადახვევა.

ეუთო/ოდირის საბოლოო ანგარიში საქართველოს 2020 წლის 26 ოქტომბრის საპარლამენტო არჩევნების შესახებ ადასტურებს ჩვენს შეშფოთებას საარჩევნო პროცესის მთლიანობასთან დაკავშირებით, რომელიც ფართოდ გავრცელებული დარღვევებითა და არასწორი გამოძიებებით იყო სავსე, რომ პასუხი გაეცა ბრალდებებზე. არჩევნები არ ჩატარდა იმ სტანდარტების შესაბამისად, რა მოლოდინიც არსებობდა ევროკავშირის კანდიდატი ქვეყნისგან.

შესაბამისად, ჩვენ განვახორციელებთ ევროკავშირის გადაწყვეტილებას საქართველოს დიპლომატიური და სამსახურებრივი პასპორტის მფლობელებისთვის უვიზო მოგზაურობის შეწყვეტის შესახებ და განვიხილავთ დამატებით ზომებს ევროკავშირსა და ეროვნულ დონეზე", — წერია გავრცელებულ განცხადებაში.