მწერლები და გამომცემლები ერთობლივ ფოტოს აქვეყნებენ და სულაკაურის გამომცემლობას სოლიდარობას უცხადებენ.

რამდენიმე დღის წინ საქართველოს პრემიერმა, ირაკლი ღარიბაშვილმა წლიური ანგარიშის წარდგენისას ისაუბრა "ლგბტ პროპაგანდაზე" და ჰომოფობიური გზავნილები გააჟღერა. მან ამავე კონტექსტში ახსენა და "პროპაგანდაში" დაადანაშაულა სულაკაურის გამომცემლობაც.

"როგორც ალბათ იცით, ამჟამად ვიმყოფებით წალენჯიხის ლიტერატურული ფესტივალი "გრანელი" 2023-ზე. ფესტივალის მონაწილე მწერლები და გამომცემლები ამ ერთობლივი ფოტოთი სოლიდარობას ვუცხადებთ სულაკაურის გამომცემლობას და ვგმობთ პრემიერ მინისტრის განცხადებას, რომელიც მიმართულია ჩვენს ქვეყანაში სიტყვისა და გამოცემის თავისუფლების წინააღმდეგ და ფართო სცენარში ითვალისწინებს ჩვენი ქვეყნის რუსიფიკაციასა და ჩვენთვის ევროპული მომავლის წართმევას!" — წერს საქართველოს წიგნის გამომცემელთა და გამავრცელებელთა ასოციაციის ვიცე-პრეზიდენტი გვანცა ჯობავა.

ღარიბაშვილს კონკრეტული ნაწარმოები არ დაუსახელებია, თუმცა სოციალურ ქსელში რამდენიმე დღის წინ მსგავსი ბრალდებით გავრცელდა ფოტოები სულაკაურის 2 წიგნიდან — ერთ-ერთია "ძილისპირული ამბები მეამბოხე გოგონებისთვის", რომელიც ცნობილ მეცნიერ, კოსმონავტ, ლიდერ ქალებზე რეალური ისტორიებს აერთიანებს, მეორე კი მე-17 საუკუნის მწერლის, შარლ პეროს ზღაპრებია.

აღსანიშნავია ისიც, რომ ჩამოთვლილთაგან ორივე წიგნი წლების წინაა გამოცემული და ამჟამად არც ერთი აღარ არის გაყიდვაში. ასევე, მსგავსი ბრალდებით რამდენიმე დღის წინ სულაკაურის გამომცემლობას "დედების სახელით" მიუცვივდნენ.

სულაკაურს მხარს გამომცემლობა არილიც უჭერს. გუნდი სულაკაურს სრულ მხარდაჭერას უცხადებს. გამომცემლობის გარშემო განვითარებულ მოვლენებს ეხმიანება საქართველოს წიგნის გამომცემელთა და გამავრცელებელთა ასოციაციაც. მათი თქმით, ბოლო დროს გახშირდა თავდასხმები გამომცემლობებსა და ცალკეულ წიგნებზე აგრესიული პირების, მედიის თუ პოლიტიკური ძალების მხრიდან, ამ მოცემულობაში კი, საგანგაშოა მაღალი რანგის სახელმწიფო მოხელის ნებისმიერი მსგავსი განცხადება, რომელიც სიტყვის თავისუფლების შეზღუდვის მოწოდებად აღიქმება.

სულაკაურს ასევე მხარდაჭერას უცხადებს მწერალი ზვიად კვარაცხელიაც. კვარაცხელიას განცხადებით, ის, რასაც სულაკაურის გამომცემლობის წინააღმდეგ ახორციელებს სამთავრობო პროპაგანდისტული მედია, სახიფათოა და თავისუფალი სიტყვის ჩასახშობადაა მიმართული.

გამომცემლობას მხარს უჭერს მწერალთა სახლიც. მათი განცხადებით, ხელისუფლების მიერ გამომცემლობის "ლგბტ პროპაგანდაში" დადანაშაულება ყოველგვარ საფუძველს მოკლებულია. მათი თქმით, ეს მხოლოდ აძლიერებს აგრესიას კონკრეტული ადამიანების მიმართ და აჩენს ცენზურის ნიშნებს სახელმწიფოში, სადაც გამოხატვის თავისუფლება კონსტიტუციითაა დაცული.