24 ივნისს ინტერნეტსივრცეში გავრცელდა ვიდეო, სადაც ჩანს, რომ რამდენიმე ქართველი მომღერალი, მათ შორის, ნუცა ბუზალაძე, დათო ხუჯაძე, მიშო სულუხია და სხვები მოსკოვის ერთ-ერთ რესტორანში ერთობიან. მომღერლებმა ღონისძიებაზე სიმღერა სამშობლოც შეასრულეს.

ვიდეოებში ვხედავთ რუსეთში მოღვაწე მომღერალ სოსო პავლიაშვილს და მეგი გოგიტიძეს, რომელიც უკრაინის ომის ფონზეც აგრძელებდა რუსეთში სიმღერას. წვეულებას ესწრებოდა პუტინისტური ძალადობრივი ჯგუფის, ალტ-ინფოს დამფუძნებელი, კონსტანტინე მორგოშიაც. დაბადების დღიდან ვიდეოებს სოციალურ ქსელში ეკატერინა სტეფანოვა ავრცელებს.

მომღერალი მიშო სულუხია რუსეთში სიმღერასთან დაკავშირებით სოციალურ ქსელში პოსტს აქვეყნებს, სადაც უარყოფს ბრალდებას, რომ რუსეთში კონცერტის ჩასატარებლად ჰონონარი აიღო და ამბობს, რომ იქ მეგობრის დაბადების დღეზე ჩავიდა. მომღერალი მოსკოვში სიმღერა სამშობლოს შესრულებაზე კომენტარს არ აკეთებს და წერს, რომ "როგორც იქნა, ნორმალურ სკანდალში გაეხვა".

"უიჰჰ, როგორც იქნა მეც გავეხვიე ერთ ნორმალურ სკანდალში. კი, ოკუპანტ ქვეყანაში 6 წლის უნახავი დის სანახავად და მეგობრის დაბადების დღეზე ჩავედი, ჩემი მეგობრის! სცენაზეც ავედი. ვინმეს მართლა ჰგონია, რომ ეს კონცერტი იყო და ამაში ფული ავიღე? არა, არ არის მართალი.

საზოგადოების მოტყუება ცუდი საქმეა, არ ვიცი ეს ვინ გააკეთა, მაგრამ იცოდეთ რომ ეს არც კონცერტი და არც არანაირი მნიშვნელობის მქონე ღონისძიება არ ყოფილა. ქართველი გოგონას დაბადების დღე იყო და იქ შეკრებილი ადამიანებიც ქართველები იყვნენ...

საჯარო შეფასებების დროს სწორი ინფორმაციის ცოდნა და უფრო მეტი ინტელექტის გამოვლენაა საჭირო, ვიდრე სოსო პავლიაშვილის გვერდით დადგომა სამშობლოს ღალატად ფორმულირებაა...", — წერს სულუხია.

რუსეთში სიმღერას სოციალურ ქსელში გამოეხმაურა მომღერალი ნუცა ბუზალაძეც, რომელმაც მხარდამჭერებს ბოდიში მოუხადა და თქვა, რომ დაბადების დღეზე მეგობრის თხოვნით იმღერა.