რატომ არის მნიშვნელოვანი: მე-18 დღეა, ჭიათურელი მაღაროელები და მათი მხარდამჭერები მძიმე სამუშაო პირობების გაუმჯობესების მოთხოვნით საპროტესტო აქციებს მართავენ.

  • ხუთ დღეზე მეტია, პროტესტმა თბილისშიც, პარლამენტის წინ, გადაინაცვლა.
  • გაფიცულების ნაწილმა უვადო შიმშილობა გამოაცხადა როგორც ჭიათურაში, ისე თბილისში.
  • ერთ-ერთმა მაღაროელმა, გიორგი კუპატაძემ, თვალები ამოიკერა, კიდევ ერთ გაფიცულს კი პირი აქვს ამოკერილი.
  • საუბარია ისეთი ბაზისური შრომითი უფლებების დაცვაზე, როგორებიცაა: ხელფასის ზრდა ინფლაციის გათვალისწინებით, შრომის უსაფრთხოება, აღჭურვილობისა და სპეცტანსაცმლის შეცვლა, სანგრების განიავება, საშხაპეების მოწყობა, ახალი, მეტად დატვირთული და ნაკლებად ანაზღაურებული სამუშაო გრაფიკიდან, ძველ განრიგზე დაბრუნება.
  • 22 ივნისს ჯორჯიან მანგანეზმა განცხადება გაავრცელა, სადაც ირწმუნება, რომ თანამშრომლების უსაფრთხოება და ჯანმრთელობა მათი მთავარი ღირებულებაა და მაღაროელებს მაღაროების მართვაში გადაცემას სთავაზობს.

მშრომელების პასუხი: გაფიცულები ამბობენ, რომ მათი მოთხოვნა ხელფასის ზრდა და სამუშაო პირობების გაუმჯობესებაა და არა ბიზნესის მართვა, როგორც ამას კომპანია წარმოაჩენს.

  • "ძალიან კარგად იციან ის 14 პუნქტი, რაც გვაქვს მოთხოვნებში და ვიმეორებ, რომ ჩვენ, ჯორჯიან მანგანეზში დასაქმებულ მუშებს, არავის არ უნდა, რომ ჯორჯიან მანგანეზი გადმოეცეს. ეს არის სრული სისულელე", — ამბობს ერთ-ერთი მაღაროელი ფორმულასთან.
  • "ჩვენი მიზანი არაა თანამდებობები, სკამზე ჯდომა, ბევრი ფულის შოვნა. ჩვენ, წესიერი ადამიანები, დავბრუნდებით ისევ იმ სამუშაოებზე, რაც ვიცით და რისი პროფესიონალები ვართ. შრომითი ანაზღაურება იყოს ღირსეული, ესაა ჩვენი მოთხოვნა და არა ის, რომ ბიზნესი ვმართოთ", — თქვა ერთ-ერთმა მაღაროელმა საპროტესტო აქციაზე.