აშშ-ის სანაპირო დაცვის სამსახური და კომპანია OceanGate ადასტურებენ, რომ რამდენიმე დღის წინ ატლანტის ოკეანეში გაუჩინარებულ წყალქვეშა ნავზე მყოფი ყველა ადამიანი გარდაცვლილია. პრესკონფერენციაზე რიერადმირალმა ჯონ მოგერმა განაცხადა, რომ ოკეანის ფსკერზე, ჩაძირული ტიტანიკის ნარჩენებიდან, დაახლოებით, 488 მეტრის მოშორებით წყალქვეშა ხომალდის ხუთი მოზრდილი ნაწილი დააფიქსირეს. კატასტროფა, რომელმაც ტიტანი და მისი მგზავრები შეიწირა, ხომალდს შიგნით მიმართული აფეთქების შედეგი უნდა ყოფილიყო.

რიერადმირალმა დაღუპულთა ოჯახების წევრებს მიუსამძიმრა. მოგერს უჭირს იმის თქმა, შეძლებს თუ არა სანაპირო დაცვის სამსახური ცხედრების პოვნას და მათ ამოსვენებას, რადგან კატასტროფის ადგილას გარემო პირობები უკიდურესად სახიფათოა.

მართალია, სამაშველო მისია უახლოეს საათებში დასრულდება, თუმცა, გაგრძელდება სამძებრო სამუშაოები და მოკვლევა ხომალდის ნამსხვრევების ადგილას, რათა კატასტროფის გამომწვევი მიზეზები გაირკვეს.

კომპანია OceanGate-ის ტურისტული წყალქვეშა ნავი, რომელიც ჩაძირული ტიტანიკისკენ მიემგზავრებოდა, 18 ივნისს გაუჩინარდა. ბორტზე მყოფ 5 ადამიანთან კავშირი წყალში ჩაშვებიდან საათისა და 45 წუთის შემდეგ გაწყდა. მას შემდეგ დაწყებული ფართომასშტაბიანი სამძებრო სამუშაოების პროცესში მაშველებმა ძლიერი ხმაურიც დააფიქსირეს, რომელიც, ერთ-ერთი ვარაუდით, აფეთქებას შეიძლება მოჰყოლოდა.