ილინოისი აშშ-ის პირველი შტატი გახდა, რომელმაც წიგნების აკრძალვა უკანონოდ ცნო. გუბერნატორ ჯ.ბ. პრიცკერის თქმით, გადაწყვეტილებისკენ მათ სხვადასხვა შტატში განვითარებულმა მოვლენებმა უბიძგა — საჯარო სკოლებსა და ბიბლიოთეკებში წიგნების აკრძალვამ და ამოღებამ. გუბერნატორის ხელმოწერილი კანონით კი, ილინოისის შტატში არცერთ საჯარო სკოლას და ბიბლიოთეკას არ ექნება ამის საშუალება.

"წიგნების აკრძალვა სხვა არაფერია, თუ არა ცენზურა, ადამიანების, აზრებისა და ფაქტების მარგინალიზება", — ამბობს პრიცკერი, — "წიგნებს რეჟიმები კრძალავენ და არა დემოკრატიული მმართველობები".

ნაცისტები მაღაზიებიდან, ბიბლიოთეკებიდან და საწყობებიდან ამოღებულ რეჟიმისთვის მიუღებელ წიგნებს ოპერის მოედანზე წვავენ.
ბერლინი, გერმანია, 1933 წლის 10 მაისი.

ფოტო: Picture Alliance

როგორც პრიცკერმა აღნიშნა, აშშ-ში წიგნების აკრძალვა კვლავ რჩება კულტურის სფეროს დიდ გამოწვევად. ქვეყნის ბიბლიოთეკათა ასოციაციის ცნობით, მხოლოდ 2022 წელს ბიბლიოთეკებში სხვადასხვა წიგნისა თუ რესურსის აკრძალვა 1269-ჯერ მოითხოვეს. მოთხოვნა შეეხო 2 571 წიგნს, რომელთა შორისაც ჭარბობდა ლგბტქ და არათეთრკანიანი ავტორების ნამუშევრები, ან ნაწარმოებები ამ თემაზე.

ორგანიზაცია PEN America-ის ცნობით, წიგნების აკრძალვა განსაკუთრებით გახშირდა 2022-2023 სასწავლო წლის პირველ ნახევარში, მოტივი კი ხშირად ახალმიღებული კანონები იყო. მსგავსი პრაქტიკა ყველაზე მეტად ხუთ შტატშია გავრცელებული: ტეხასში, ფლორიდაში, მისურიში, იუტასა და სამხრეთ კაროლინაში.

"წიგნების აკრძალვის იდეა ჩვენი ქვეყნის საფუძველს ეწინააღმდეგება", — ამბობს ილინოისის შტატის სახელმწიფო მდივანი, ალექსი ჯენულიესი, — "ეს განათლების სფეროსთვისაც გამოწვევაა — ვასწავლოთ ჩვენს შვილებს, რომ საკუთარი აზრი გააჩნდეთ".

ასევე იხილეთ: