მთავარმა პროკურორმა ირაკლი შოთაძემ პროკურორთა საერთაშორისო კონფერენციაზე, ჟურნალისტებს აფგან მუხტარლის საქმეზე ესაუბრა. მან თქვა, რომ საქართველოს მხარე ითხოვს აფგან მუხტარლის დაკითხვას და ამ დაკითხვაზე ქართული მხარის წარმომადგენლების დასწრებას.

შოთაძემ ასევე განაცხადა, რომ საქართველოს პროკურატურამ სამართლებრივი დახმარების შუამდგომლობით უკვე მიმართა აზერბაიჯანელ კოლეგებს:

"დაკითხულია ასზე მეტი მოწმე, ამოღებულია გარესათვალთვალო კამერების ჩანაწერები, აფგან მუხტარლის ადვოკატსა და მის ოჯახის წევრებს მიეცათ შესაძლებლობა გაცნობოდნენ სისხლის სამართლის მასალებს".

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.