რატომ არის მნიშვნელოვანი: 14 მაისს თურქეთში საპარლამენტო და საპრეზიდენტო არჩევნები ჩატარდა — საპრეზიდენტოში გამარჯვებული ვერ გამოვლინდა, ამიტომ მეორე ტური დაინიშნა.

  • ქვეყანა ისტორიული არჩევანის წინაშე იყო: ორი კანდიდატი განვითარების მკვეთრად განსხვავებულ გზებზე საუბრობდა.
  • ოპოზიციური სპექტრის საერთო კანდიდატი ქემალ ქილიჩდაროღლუ ამბობდა, რომ მისი გამარჯვების შემთხვევაში თურქეთში საპარლამენტო მმართველობა იქნებოდა, სადაც პარლამენტი და პრემიერმინისტრი უფლება-მოვალეობებს გაინაწილებდნენ.
  • მოქმედ პრეზიდენტი, რეჯეფ თაიფ ერდოღანი კი 20-წლიანი მმართველობის შემდეგ თურქეთს ექვსი მილიონი სამუშაო ადგილის შექმნას და მრავალმხრივ განვითარებას ჰპირდებოდა.

მეორე ტური: ოფიციალური შედეგები ჯერ არ გამოცხადებულა.

  • თურქეთის საარჩევნო საბჭოს ბოლო განახლებით, დათვლილია დაახლოებით 75,42%: ერდოღანი — 53,41%, ქილიჩდაროღლუ — 46,59%.
  • სახელმწიფო სააგენტოს, ანადოლუს მონაცემებით კი, დათვლილია 100% და ერდოღანს 52,12% აქვს, ქილიჩდაროღლუს — 47,88%.
  • ერდოღანმა უკვე გამოაცხადა გამარჯვება და ამომრჩევლებს მადლობა გადაუხადა.
  • ქილიჩდაროღლუმ კი საარჩევნო უბნების დახურვის შემდეგ პირველ ინტერვიუში მოუწოდა მხარდამჭერებს გააგრძელონ ბრძოლა დემოკრატიისთვის.

მილოცვები: ერდოღანი უკვე იღებს მილოცვებს პარტნიორი ქვეყნებიდან. მათ შორის, საქართველოს პრემიერმინისტრი და რუსეთის პრეზიდენტიცაა.

  • ამ სიაში ერთ-ერთი პირველი უნგრეთის პრემიერი იყო, რომელიც ევროპაში ვლადიმერ პუტინის მოკავშირედ მიიჩნევა.
  • როგორც Aljazeera წერს, ერდოღანს მიულოცეს პალესტინის პრემიერმინისტრმა, აზერბაიჯანის, ირანის და ვენესუელას პრეზიდენტებმა.
  • "ჩემო ძვირფასო ძმაო, რეჯეფ თაიფ ერდოღან, გილოცავთ გამარჯვებას", — დაწერა ყატარის ემირმა.
  • რუსეთის პრეზიდენტმა მისალოც ტექსტში ერდოღანს ძვირფასი მეგობარი უწოდა და განაცხადა, რომ გამარჯვება იმის მტკიცებულებაა, თურქი ხალხი აფასებს მის თავდაუზოგავ მუშაობას და დამოუკიდებელ საგარეო პოლიტიკას.
  • "ჩვენ ძალიან ვაფასებთ თქვენს პირად წვლილს რუსეთ-თურქეთის მეგობრული ურთიერთობების განმტკიცებაში და სხვადასხვა სფეროში ურთიერთსასარგებლო თანამშრომლობის საქმეში", — განაცხადა პუტინმა.
  • ირაკლი ღარიბაშვილმა კი ტვიტერზე დაწერა, რომ ულოცავს საქართველოს დიდ მეგობარს, თურქეთის ლიდერად ხელახლა არჩევას.
  • "თურქმა ხალხმა თავისი აზრი დააფიქსირა და ჩვენ ვუერთდებით მათ დღესასწაულს. ჩვენ მზად ვართ კიდევ უფრო გავაძლიეროთ მეგობრობისა და სტრატეგიული პარტნიორობის კავშირები თურქეთსა და საქართველოს შორის", — ვკითხულობთ პოსტში.