რატომ არის მნიშვნელოვანი: ვლადიმერ პუტინის განკარგულებით, ცალმხრივად დაწესებული სავიზო რეჟიმი გაუქმდა და ოკუპანტ ქვეყანასთან პირდაპირი ფრენები აღდგა. ქართულმა მხარემ კი მალევე მისცა თანხმობა რუსულ ავიაკომპანიას, რომ თბილისში ეფრინა.

• მოსკოვიდან გამოფრენილი რუსული აზიმუტის თვითმფინავი საქართველოში უკვე დაჯდა.

• პარალელურად, მოქალაქეები თბილისის საერთაშორისო აეროპორტში შეიკრიბნენ და 4 წლის შემდეგ ჩამოფრენილ პირველ რუსულ რეისს პროტესტით დახვდნენ.
• პოლიცია რუსული ფრენების საწინააღმდეგო აქციის მონაწილეებს აკავებს. დროას ლიდერის, ელენე ხოშტარიას ინფორმაციით, 6 ადამიანია დაკავებული.
• ადგილზე სამართალდამცავების დიდი რაოდენობაა მობილიზებული, ტერიტორიაზე იმყოფება საპატრულო პოლიციის უფროსი, ვაჟა სირაძე.

პარალელურად, რუსულმა პროპაგანდიტულმა რიამ გაავრცელა ვიდეო, სადაც ჩანს, რომ ბორტგამცილებელი პირველი რუსული რეისის მგზავრებს შამპანურით უმასპინძლდება.

• თვითფრინავმა, რომელიც რამდენიმე წუთის წინ დაეშვა, ის ქართველი პრორუსი პოლიტიკოსებიც ჩამოიყოლა, რომლებიც კრემლისტური ნარატივების გავრცელებითა და რუსული ხელისუფლებასთან კავშირებით არიან ცნობილი.
• მედიების მიერ გავრცელებულ კადრებში ჩანს, როგორი გამალებით იცავს მათ პოლიცია რუსული ფრენების საწინააღმდეგო აქციის მონაწილეებისგან.
• მათ შორის ერთ-ერთი პრორუსი პოლიტიკოსი და ჟურნალისტი, ვალერი კვარაცხელიაა, რომელიც მედიასთან გაკეთებულ პირველივე კომენტარში ამბობს, რომ "მოჯადოებული წრის გარღვევა შეძლეს".
• "ვინც რუსეთი ოკუპანტად გადააქცია, ის ახლა გარეთ დგას და წკავწკავებს. ჩვენ რუსეთს გადავაქცევთ მეგობრად და გავათავისუფლებთ ყველაფეს, რაც გასათავისუფლებელია".
• აზიმუტით ჩამოფრინდა კიდევ ერთი პრორუსი, მერაბ ჭიქაშვილიც, რომელმაც იკადრა და ფრენების აღდგენას მოსახლეობის გამარჯვება უწოდა.
• ასევე, თქვა, რომ ორგანიზაცია სოლიდარობა მშვიდობის სახელი პირადად მონაწილეობდა ფორუმში, სადაც დუმის დეპუტაციასთან უვიზო რეჟიმის მოხსნისა და ფრენების აღდგენის საკითხი დააყენეს.

შსს აქციის მონაწილეებს მოუწოდებს, პროტესტი დასაშვებ ტერიტორიაზე გამოხატონ, დაიცვან მართლწესრიგი და დაემორჩინონ სამართალდაცმავების მოთხოვნებს.

• "უსაფრთხოების ზომებიდან გამომდინარე, აეროპორტის ჩამოფრენის დარბაზში დაიშვებიან მხოლოდ ის მოქალაქეები, რომლებმაც უშუალოდ უნდა ისარგებლონ აეროპორტის მომსახურებით და ობიექტეზე დასაქმებული პირები", — ნათქვამია განცხადებაში.

რუსები ფრენების აღდგენით კმაყოფილებას არ მალავენ.

• რუსულ პროპაგანდისტულ მედიებზე ვრცელდება ვიდეოები, რომელშიც მოსკოვიდან გამოფრენამდე მგზავრები საუბრობენ იმაზე, რომ საქართველოში "ხინკლის საჭმელად მოდიან".
• "როდემდე შეიძლებოდა ყველაფრის მოსკოვში დალევა, ახლა საქართველოშიც შეიძლება", — ამბობდა კრემლის პროპაგანდისტი, თინა კანდელაკმა რამდენიმე დღის წინ ჩაწერილ ვიდეოში.

ამასობაში, ქართული ოცნება დუმს. თუმცა რუსული რეისის ჩამოფრენას საქართველოს პრეზიდენტი, სალომე ზურაბიშვილი გამოეხმაურა და დაწერა: "არა რუსულ ფრენებს".

• ლელოს ლიდერის, მამუკა ხაზარაძის განცხადებით, საქართველოს ანექსია მიმდინარეობს.
• ყოფილი სახალხო დამცველის, ნინო ლომჯარიას თქმით, ხელისუფლებაში ყოფნიდან მეცამეტე წელს ქართული ოცნება წარმატებად გვასაღებს ომის საერთაშორისო დანაშულში ძებნილ, დასანქცირებულ, იზოლირებულ, ყველასგან მოძულებულ პუტინის ხელისუფლებასთან შეთანხმების მიღწევას.
• "შეხედეთ, ვის უხარია ფრენები და მიხვდებით, ვის სჭირდებოდა მისი აღდგენა. ოცნებავ, ესეც არაა თქვენი დამსახურება, ოღონდ, დასჭირდა კრემლს საქართველო და გიყენებენ", — წერს ის.
• დღეს, 20:00 საათზე პარლამენტთან აქცია გაიმართება.