ამის შესახებ მაჭუტაძემ პარლამენტში გამართულ ბრიფინგზე ისაუბრა.

რატომ არის მნიშვნელოვანი: დღეს, 17 მაისს, პარლამენტის პლენარულ სხდომაზე იუსტიციის უმაღლესი საბჭოს არამოსამართლე წევრად ასარჩევად 29 კანდიდატს ეყარა კენჭი. კვორუმისთვის 90 დეპუტატის მხარდაჭერა იყო საჭირო.

  • საბოლოოდ, სამი კანდიდატი შეირჩა: ტრისტან ბენაშვილი და ზურაბ გურასპაშვილი — 93-93 ხმით, გიორგი გზობავა კი 91 ხმით.
  • უმრავლესობაში ამჟამად 84 დეპუტატია, რაც იმას ნიშნავს, რომ კანდიდატებს მხარდაჭერა საპარლამენტო ოპოზიციის წევრებმაც გამოუცხადეს.
  • ოპოზიციის ნაწილი ფიქრობს, რომ ზოგიერთი მათგანი ქართულ ოცნებას გაურიგდა, ამიტომაც მათ დარბაზი ხმაურის ფონზე, პროტესტის ნიშნად დატოვეს.
  • TV პირველი და რუსთავი 2 წერდნენ, რომ ოცნებასთან გარიგებაში "ეჭვმიტანილი" რამდენიმე დეპუტატია: ნიკა მაჭუტაძე, ნატო ჩხეიძე, როსტომ ჩხეიძე, დილარ ხაბულიანი და ბაჩუკი ქარდავა.

დეტალები: მაჭუტაძე ქართულ ოცნებასთან გარიგებას უარყოფს, ბრალდებებს "უსინდისო ტყუილს" უწოდებს და ამბობს, რომ მათ ე.წ. სასამართლო კლანთან არაფერი აკავშირებთ.

  • "ჩვენს დღევანდელ გადაწყვეტილებას, ასე ვთქვათ, სრულად ვიზიარებთ და რასაკვირველია, ჩვენ, მიუხედავად იმისა, რომ ადამიანები საუბრობდნენ დამალვაზე, გარკვეულ ბრალდებებს იყენებდნენ, უარვყოფთ და ვამბობთ, რომ ჩვენ არსად არ ვიმალებით".
  • მისი თქმით, არც თავად და არც როსტომ და ნატო ჩხეიძეები არავის გარიგებიან და ქართული ოცნების არცერთ წევრთან არც შეხვედრა და არც სატელეფონო საუბარი ჰქონიათ.

გარდა ამისა, როგორც მაჭუტაძემ ბრიფინგზე განაცხადა, ოპოზიციურ ფლანგში კომუნიკაციის პრობლემა არსებობდა და მათთვის არავის უთქვამს, რომ ხმა არცერთი კანდიდატისთვის არ უნდა მიეცათ.

  • "ამასთან ერთად, მე ვაცნობიერებ იმას, რომ ამ საზოგადოებრივი რეაქციიდან გამომდინარე, რაც ქვეყანაში არის, იმ რეაქციიდან გამომდინარე, რაც საქართველოს დემოკრატიულ საზოგადოებას გაუჩნდა, შესაძლოა, ჩვენი ეს პოზიცია ყოფილიყო ერთგვარი კომუნიკაციის პრობლემა", — ამბობს ის.