რატომ არის მნიშვნელოვანი: თბილისში, აღმაშენებლის გამზირზე მდებარე ერთ-ერთ ოფისში, სამართალდამცველებმა სპეცოპერაცია ჩაატარეს.

  • ფინანსთა სამინისტროს საგამოძიებო სამსახურში ამბობენ, რომ საპროცესო და საგამოძიებო მოქმედებები ე.წ. ქოლცენტრებზე მიღებულ შეტყობინებას უკავშირდება.
  • პარალელურად, პროსახელისუფლებო მედიებმა გაავრცელეს ინფორმაცია, რომ აღმაშენებლის გამზირზე მდებარე შენობაში, სადაც სამართალდამცველები მუშაობდნენ, რეგისტრირებულია სასტუმრო, რომლის 25%-საც გიორგი ვაშაძის ძმა, დავით ვაშაძე ფლობს.
  • პრაიმტაიმი, ანონიმურ წყაროზე დაყრდნობით, ირწმუნება, რომ იქ მდებარე ქოლცენტრი გიორგი ვაშაძესა და უკრაინელ პოლიტიკოსს, დავით არახამიას ეკუთვნით.

დეტალები: სტრატეგია აღმაშენებლის ლიდერი ქოლცენტრებთან კავშირს კატეგორიულად უარყოფს და გავრცელებულ ინფორმაციას "რუსული რეჟიმის მორიგ დეზინფორმაციას" უწოდებს.

  • "უნდათ, გაგვსვარონ მე და ჩემი ძმა. ეს არის 100-პროცენტიანი ტყუილი. ქოლცენტრების უკან თუ ვინმე დგას საქართველოში, ეს არის რუსული ოცნება, რომელიც ფინანსდება თავიდან ბოლომდე ამ ქოლცენტრების თაღლითური სქემით, რომელსაც მფარველობენ სუს-ის, შსს-ის, პროკურატურის პირველი პირები", — განაცხადა ვაშაძემ.
  • მისივე თქმით, გერმანელ სამართალდამცველებს დაუკავშირდება, რათა მაქსიმალური ინფორმაცია მიაწოდოს.
  • "ყველა ინფორმაციას, რასაც მოვაგროვებთ, ყველა ჩემს კონტაქტს ევროკავშირში გამოვიყენებთ იმისთვის, რომ ეს თაღლითი მავნებლები, ეს კრიმინალები მიეცნენ პასუხისგებაში", — თქვა მან.
  • ვაშაძე ამბობს, რომ ქართულ ოცნება საკუთარი დანაშაულის სხვაზე გადაბრალებასა და ისრების გადატანას ცდილობს.
  • "ლილუაშვილს ვეუბნები, შს მინისტრს, მთავარ პროკურორს, ფეხებს ვერ მომჭამთ ძირში! მე ვერ გამაჩერებთ! გინდათ, გავჩერდე, უკან დავიხიოთ რუსულ რეჟიმთან ბრძოლაში. ვერ მოგართვით!"

ბრალდებას უარყოფს ვაშაძის ძმაც. ამბობს, რომ მას შენობის მეორე სართული ეკუთვნის, დანარჩენი ფართის დანიშნულებაზე კი ინფორმაცია არ აქვს.

  • "სხვა ფართებთან მე საერთოდ შეხება არ მაქვს და ვერ მაქვს. ასეთი გადანაწილება არის, რომ ეს ნაწილი არის ჩემი, რაზეც პასუხისმგებელი ვარ. სხვებზე ვერც ვერთვები. ამიტომ მე ინფორმაცია არ მქონდა. დისტანციურად ვმართავ სასტუმროს. სეზონიც დაბალია და შესაბამისად, როცა აქ მოვდიოდი, ზემოთ, საერთოდ არც ვიცოდი, თუ გახსნილი იყო [რამე]", — თქვა მან.