თურქეთში საპრეზიდენტო არჩევნები 14 მაისს გაიმართება.

რატომ არის მნიშვნელოვანი: მოსალოდნელია, რომ არჩევნები განსაზღვრავს ქვეყნის როლს ნატოს ალიანსში, მის ურთიერთობას აშშ-სთან, ევროკავშირთან და რუსეთთან, მიგრაციის პოლიტიკას, ანკარას როლს უკრაინის ომში და სხვა მნიშვნელოვან უსაფრთხოების ასპექტებს.

  • ქემალ ქილიჩდაროღლუ, რომელსაც მხარს უჭერს ექვსპარტიული ოპოზიციური ალიანსი, ამბობს, რომ გამარჯვების შემთხვევაში ის თურქეთს მშვიდობას და დემოკრატიას მოუტანს.
  • 74 წლის პოლიტიკოსი, მეტსახელად "თურქი განდი", რომელიც ხელმძღვანელობს მთავარ ოპოზიციურ რესპუბლიკურ სახალხო პარტიას (CHP), ერდოღანის მთავარი კონკურენტია და წინასწარი გამოკითხვებით მას მოქმედ პრეზიდენტთან შედარებით მცირე უპირატესობა აქვს.
  • 14 მაისის კენჭისყრა, სავარაუდოდ, იქნება ყველაზე მწვავე რბოლა ერდოღანის 20-წლიანი მმართველობის პერიოდში — რადგან ქვეყანა ებრძვის ინფლაციას და დამანგრეველი მიწისძვრის შედეგებს.
  • დაძაბული რბოლა, სავარაუდოდ, ორი კვირის შემდეგ მეორე ტურში გაგრძელდება.

დეტალები: ქილიჩდაროღლუ აცხადებს, რომ თურქეთში პოლიტიკაში ყოფნა ნიშნავს რისკიანი ცხოვრების არჩევას.

  • "რაც არ უნდა გაკეთონ ერდოღანმა და მისმა მოკავშირეებმა, მე ჩემს გზას გავუყვები. ისინი ვერ დამაკავებენ. ვერ შემაშინებენ. მე პირობა მივეცი ამ ერს", — დასძენს იგი.
  • "ახალგაზრდობას სურს დემოკრატია", — განუცხადა მან BBC-ს. "მათ არ უნდათ, რომ პოლიცია მათ კარებთან დილით ადრე მივიდეს მხოლოდ იმიტომ, რომ ტვიტერზე რაღაც დაწერეს".
  • პრეზიდენტობის კანდიდატი ირწმუნება, რომ არჩევის შემთხვევაში ახალგაზრდებს თავისუფლად შეეძლებათ მისი კრიტიკა.
  • მოქმედი კანონმდებლობით, თურქები შესაძლებელია ციხეში მოხვდნენ "პრეზიდენტის შეურაცხყოფისთვის".

ერდოღანი 20 წელის თურქეთს მართავს ჯერ პრემიერმინისტრის, ამჟამად კი პრეზიდენტის პოსტიდან.

  • იგი კონკურენტს წარსულში დასცინოდა და აცხადებდა, რომ ქილიჩდაროღლუს "ცხვრის მომწყემსვაც კი არ შეუძლია".
  • ოპოზიციის დასაყრდენ საპორტო ქალაქ იზმირში მიტინგზე მისულ ოპოზიციის კანდიდატს მხარდამჭერების დიდი რაოდენობა დახვდა.
  • ექსპერტების შეფასებით, თურქეთი ახლა მკვეთრი არჩევანის წინაშე დგას.
  • საზოგადოებრივი აზრის გამოკითხვის მიხედვით, ქილიჩდაროღლუ საპრეზიდენტო არჩევნებში გაიმარჯვებს, მაგრამ პრეზიდენტის ალიანსი მას წინ უსწრებს საპარლამენტო არჩევნებში.