დღეს, დეკანოიძემ და გოცირიძემ პარლამენტში ახალი პოლიტიკური ჯგუფის შექმნის შესახებ განაცხადეს.

დეტალები: ევროოპტიმისტები — ასე ერქმევა 2-კაციან საპარლამენტო პოლიტიკურ ჯგუფს.

  • სახელის შერჩევასთან დაკავშირებით გოცირიძემ დახმარება სოციალურ ქსელ ფეისბუქზე ითხოვა.
  • დეპუტატის განცხადებით, კომენტარებში ხშირად იყო ნახსენები სიტყვა ევროპის სხვადასხვა ვარიაცია, რამაც იგი საბოლოო ვარიანტამდე მიიყვანა.
  • "ჩათვალეთ, რომ ნათლობაში მიიღეთ მონაწილეობა", — მადლობას უხდის გოცირიძე ციფრულ აუდიტორიას.

რატომ არის მნიშვნელოვანი: ხატია დეკანოიძემ და რომან გოცირიძემ ნაციონალური მოძრაობა მას შემდეგ დატოვეს, რაც პარტიის თავმჯდომარე ლევან ხაბეიშვილი გახდა.

  • დეპუტატები თანაპარტიელებთან არსებულ აზრთა სხვადასხვაობაზე საუბრობდნენ, ძირითადად კი, საპარლამენტო ბოიკოტსა და სესიებში არმონაწილეობას ეწინააღმდეგებოდნენ.

დეკანოიძე ამბობს, რომ პოლიტიკური ჯგუფის ხელმძღვანელი რომან გოცირიძე იქნება.

  • "ვფიქრობ, რომ ეს არის სწორი გადაწყვეტილება, ეს არის კარგი გადაწყვეტილება. გამოვიყენებთ ყველა საპარლამენტო რესურსს, ჩემი და ბატონი რომანის პოზიცია იცით, ეს იქნება, მათ შორის, აპარატში მუშაობა, საპარლამენტო მუშაობა, დელეგაციებში ჩვენი მონაწილეობა", — თქვა მან.
  • გოცირიძე ამბობს, რომ გამორიცხული არ არის პოლიტიკური ჯგუფი გაფართოვდეს და მათ სხვა დეპუტატებიც შეუერთდნენ.
  • "მიგვაჩნდა და დღესაც მიგვაჩნია, რომ საქართველოს პარლამენტი არის უდიდესი რესურსი, რომლის არგამოყენება სრული დატვირთვით არის დანაშაულის ტოლფასი", — თქვა მან.